અમરેલીના ખાંભામાં શ્વાન 2 વર્ષના માસૂમને મોઢામાં દબાવી ભાગ્યું, ગામમાં ભયનો માહોલ

Amreli News: અમરેલી જિલ્લાના ખાંભા ગીરના સમઢિયાળા ગામે શ્વાને 2 વર્ષના બાળક પર હુમલો કરી તેને મોઢામાં ઉઠાવીને ભાગવાની કોશિશ કરતા સમગ્ર પંથકમાં ખળભળાટ મચી ગયો છે. સદનસીબે માતા-પિતાની સતર્કતાને કારણે બાળકનો જીવ બચી ગયો છે, પરંતુ શ્વાનના હુમલામાં માસૂમને ગંભીર ઈજાઓ પહોંચી હતી. 

શ્વાન બાળકને ઉઠાવી ભાગ્યું, માતા-પિતાએ પાછળ દોડ્યાં

બનાવની વિગતો મુજબ, સમઢિયાળા ગામે રહેતા પરિવારનો 2 વર્ષનો બાળક પોતાના ઘર પાસે રમી રહ્યો હતો. આ દરમિયાન એકાએક શ્વાન ત્યાં ધસી આવ્યું હતું અને માસૂમ બાળક પર હુમલો કરી તેને મોઢામાં દબાવીને ભાગવા લાગ્યું હતું. આ દ્રશ્ય જોઈ માતા-પિતાના જીવ તાળવે ચોંટ્યા હતા અને તેમણે શ્વાન પાછળ દોટ મૂકી હતી. સતત પીછો કરવાને કારણે શ્વાન બાળકને અધવચ્ચે મૂકીને નાસી છૂટ્યું હતું.

7 ટાંકા આવ્યા, અમરેલી સિવિલમાં ખસેડાયો

શ્વાને બાળકના માથાના ભાગે ગંભીર બચકાં ભર્યા હોવાથી તેને લોહીલુહાણ હાલતમાં તાત્કાલિક હોસ્પિટલ ખસેડવામાં આવ્યો હતો. ઈજાગ્રસ્ત બાળકને માથાના ભાગે 7 ટાંકા આવ્યા હતા. અમરેલીની સિવિલ હોસ્પિટલ ખાતે બાળકની સારવાર કરવામાં આવી હતી. 

આ પણ વાંચો: કચ્છમાં ચિત્તાના પુનઃવસવાટ માટે NTCAની લીલી ઝંડી, બન્નીના ઘાસિયા મેદાનમાં બનશે અભયારણ્ય, કેન્યાથી 4 ચિત્તા લાવાશે!

ગામમાં ભયનો માહોલ

આ ઘટનાને પગલે નાના એવા સમઢિયાળા ગામમાં ભયનો માહોલ છવાઈ ગયો છે. ગ્રામજનોમાં રોષ જોવા મળી રહ્યો છે કે રખડતા શ્વાનોના ત્રાસને કારણે હવે બાળકોનું ઘરની બહાર નીકળવું પણ જોખમી બન્યું છે.