અણીલા ગામે સફાઈ માટે રૂ. ત્રણ લાખની ગ્રાન્ટ છતાં ઠેરઠેર ગંદકી

અનેક રજૂઆત બાદ પણ પંચાયત દ્વારા કોઈ ઉકેલ નહીં  

પ્રાથમિક શાળાની આસપાસ ગંદકી હોવાથી 200 વિદ્યાર્થીઓમાં રોગચાળાની દહેશત

મહુધા તાલુકાનું અલીણા ગામ તાલુકાથી સૌથી વધુ ૧૪ હજારની વસ્તી ધરાવતું ગામ છે. ગામમાં સફાઈ માટે વર્ષે આશરે ૩ લાખથી પણ વધુની ગ્રાન્ટ આવે છે. ગામમાં મુખ્ય કચેરીની સામે કાંસ આવેલું છે, જેમાં ગંદકીના ઢગ જોવા ખડકાયેલા છે અને અતિશય દુર્ગંધ પણ આવી રહી હોવાથી લોકો ત્રસ્ત છે. આ મામલે ગ્રામજનો દ્વારા પંચાયતમાં વારંવાર રજૂઆત કરવામાં આવી હોવા છતાં પંચાયચ તંત્ર દ્વારા કોઈ નિરાકરણ લાવવામાં આવતું નથી. 

તેમજ કાંસ વિભાગ દ્વારા ચાલુ વર્ષે કોઈ સફાઈ કરવામાં આવી ન હતી. 

અલીણા ગામના તલાટી કુંદનકુમાર પટેલને તેમની મુખ્ય કચેરી બહારની ગંદકી બાબતે પૂછતા તેમના દ્વારા જણાવાયું હતું કે, સફાઈ કરવી છે પણ ગામના લોકો કચરો નાખી જાય છે, તેવો ઉડાઉ જવાબ આપ્યો હતો. જ્યારે ગામની પ્રાથમિક શાળાની પાસે પણ ગંદકી જોવા મળે છે, જેથી શાળામાં આભ્યાસ કરતા ૨૦૦ જેટલા વિદ્યાર્થીઓમાં પણ રોગચાળાનો ભય ફેલાયો છે.