- નેશનલ હાઈવે નંબર 48 પર અકસ્માત
- અકસ્માત સર્જીને અજાણ્યો વાહન ચાલક ફરાર, ખેડા ટાઉન પોલીસે ગુનો નોંધી તપાસ હાથ ધરી
નડિયાદ : ખેડા ટાઉન પોલીસ મથકની હદમાં આવેલ નેશનલ હાઈવે નંબર ૪૮ પર મંગળવારે મધરાત્રે જેસવાપુરા સીમ હોટલ નજીક રોડ ક્રોસ કરી રહેલા ટ્રક ચાલકને અજાણ્યા વાહને અડફેટે લેતા તેનું ઘટનાસ્થળે જ કમકમાટીભર્યું મોત નીપજ્યું હતું. આ બનાવ અંગે ખેડા ટાઉન પોલીસે ગુનો નોંધી વધુ કાર્યવાહી હાથ ધરી હતી.
રાજસ્થાનમાં નાગોર જિલ્લાના મંગલપુરામાં રહેતા શ્યામસુંદર ધનરાજ નાગપુરિયા મંગળવારે રાત્રે હાલોલથી કન્ટેનરમાં માલ સામાન ભરી ફ્લિપકાર્ટના ગોડાઉન પર માલ ખાલી કરવા આવ્યા હતા. તા.૧૭ના રાત્રિના સમયે તેઓ કન્ટેનર ખાલી કરવા મૂકી જમવા માટે હાઈવે પર આવેલી એક હોટલ તરફ જઈ રહ્યા હતા. ત્યારે રાત્રિના આશરે સવા બારેક વાગ્યાના સુમારે કન્ટેનર ચાલક જેસવાપુરા સીમ સનરાઈઝ હોટલની સામે રોડ ક્રોસ કરી રહ્યાં હતા, ત્યારે કોઈ અજાણ્યા વાહન ચાલકે પોતાનું વાહન ગફલતભરી રીતે ચલાવી શ્યામસુંદર (ઉં.વ.૬૨)ને ટક્કર મારતાં કન્ટેનર ચાલકનું માથામાં તેમજ શરીર ઉપર ગંભીર ઇજા થતાં સ્થળ પર જ મોત નિપજ્યું હતું.
આ અકસ્માત સર્જ્યા બાદ અજાણ્યો વાહન ચાલક પોતાનું વાહન લઈને અંધારાનો લાભ ઉઠાવી ફરાર થઈ ગયો હતો. આ ઘટનાની જાણ થતા જ ૧૦૮ એમ્બ્યુલન્સ અને પોલીસ કાફલો ઘટનાસ્થળે પહોંચી ગયો હતો. મૃતકના ખિસ્સામાંથી મળેલા આધારકાર્ડના આધારે તેમની કન્ટેનર ચાલકની ઓળખ થઈ હતી. આ બનાવ અંગે ફ્લિપકાર્ટ ગોડાઉનના સુપરવાઈઝર રમેશભાઈ મફતભાઈ સોઢા પરમારની ફરિયાદ આધારે ખેડા ટાઉન પોલીસે અજાણ્યા વાહન ચાલક સામે ગુનો નોંધી કાર્યવાહી હાથ ધરી હતી.
