અમદાવાદ શહેરમાં કોંગ્રેસના હાથમાંથી સાત બેઠકો સરકી ગઇ, ધાકધમકી-લાલચ સામે કોંગ્રેસના ઉમેદવારો ઝુક્યાં

Ahmedabad News: અમદાવાદ શહેરમાં તો મતદાન પહેલાં જ કોંગ્રેસે હારનો સામનો કરવો પડ્યો હોય તેવી સ્થિતિ સર્જાઈ છે. ધાકધમકી અને લોભ-લાલચની રાજનીતિ સામે કોંગ્રેસ ઝૂકી ગઈ હોય તેવું રાજકીય ચિત્ર ઉપસ્યું છે. શહેરના ચારેક વોર્ડમાં ઉમેદવારોએ જ ફોર્મ પરત ખેંચતાં કોંગ્રેસના હાથમાંથી 7 બેઠકો સરકી ગઈ છે.

ચાર વોર્ડમાં ચકચાર!

સરખેજ, થલતેજ, ચાંદલોડિયા અને વાસણામાં કોંગ્રેસના ઉમેદવારો ચૂંટણી મેદાનમાંથી હટી ગયા છે. કોંગ્રેસના પ્રતિનિધિમંડળે રાજ્ય ચૂંટણી પંચને ગઈકાલે જ ફરિયાદ કરી હતી કે, ભાજપના ઈશારે પોલીસ કોંગ્રેસના ઉમેદવારોને ધમકી આપી રહી છે. દરમિયાન થલતેજ વોર્ડમાં કોંગ્રેસના ઉમેદવાર રમીલાબેન ઠાકોરે ફોર્મ પરત ખેંચતા ભાજપના ઉમેદવાર રીટાબેન ઠાકોર બિનહરીફ વિજેતા જાહેર કરાયાં છે. જ્યારે સરખેજ વોર્ડમાં કોંગ્રેસના ઉમેદવાર વારિસ સૈયદે ફોર્મ પરત ખેંચી ચૂંટણી મેદાનમાંથી પીછેહઠ કરી લીધી હતી. બે દિવસ પહેલાં જ કોંગ્રેસના ઉમેદવાર ભરતભાઈ ભરવાડે ફોર્મ પરત ખેંચી લીધું હતું. આ જોતાં કોંગ્રેસને ઝટકો લાગ્યો છે. આ બેઠક પર કુલ મળીને ત્રણ ઉમેદવારો ચૂંટણી મેદાનમાંથી હટી ગયા છે.

કોંગ્રેસ ઉમેદવાર સમયસર ફોર્મ જ ન ભરી શક્યાં

ચાંદલોડિયા વોર્ડમાં પણ કોંગ્રેસ ઉમેદવાર પ્રદીપ પટેલે ફોર્મ પરત ખેંચ્યું હોવાનું જાણવા મળ્યું છે. આ ઉપરાંત વાસણા વોર્ડમાં ઓબીસી મહિલા ઉમેદવારનું ફોર્મ સમયસર ન ભરાતા આ બેઠક પણ કોંગ્રેસના હાથમાંથી જતી રહી છે. આમ, કુલ મળીને છ બેઠકો પર ઉમેદવારોએ ચૂંટણી લડશે જ નહી જેના કારણે ભાજપના ઉમેદવારો બિનહરીફ થઇ ગયા છે. 

રામોલ-હાથીજણમાં ફોર્મ પરત ખેંચવા કોંગ્રેસના ઉમેદવારને 25 લાખની ઓફરનો આક્ષેપ

આજ સવારથી સોશિયલ મીડિયામાં અમદાવાદ મ્યુનિ.ની રામોલ-હાથીજણ બેઠક પરથી કોંગ્રેસના મહિલા ઉમેદવાર બીના મોદીનો વીડિયો વાયરલ થઈ રહ્યો છે. જેમાં તેમને ફોર્મ પરત ખેંચવા માટે પૂર્વ કોર્પોરેટર અને હાલ ભાજપમાંથી રામોલ બેઠક પરના ભાજપના ઉમેદવાર મૌલિક અતુલભાઈ પટેલ દ્વારા રૂ. 25 થી 50 લાખની લોભામણી ઓફર કરી દબાણ કરાતું હોવાનો આક્ષેપ કરાયો છે. જ્યારે મૌલિક પટેલે આ આક્ષેપને પાયાવિહોણો ગણાવ્યો છે. તેમના અનુસાર, 'મહિલા ઉમેદવાર માટે પહેલેથી બેઠક અનામત હોય છે. હું પુરુષ ઉમેદવાર તરીકે લડું છું, ત્યારે મારી બેઠક બિનહરીફ કરાવવા માટે મહિલા ઉમેદવારને ફોર્મ પરત ખેંચાવવાનો કોઈ અર્થ નથી.'