વડોદરાઃ ધો.૧૦ અને ધો.૧૨ની હાલમાં ચાલી રહેલી બોર્ડ પરીક્ષાઓની સાથે સાથે હવે બોર્ડ પરીક્ષાઓના સીસીટીવી ફૂટેજની પણ ચકાસણી શરુ કરી દેવામાં આવી છે.આ માટે ડીઈઓ કચેરી દ્વારા ૨૦-૨૦ શિક્ષકોની બે ટીમો બનાવવામાં આવી છે.
એક ટીમને ધો.૧૦ અને એક ટીમને ધો.૧૨ના ફૂટેજની ચકાસણીની જવાબદારી સોંપવામાં આવી છે.ઉલ્લેખનીય છે કે, પરીક્ષા દરમિયાન સ્થાનિક સ્કવોડ હવે રાખવામાં આવતી નથી ત્યારે ગેરરીતિ પર નજર રાખવા માટે મોટાભાગે સીસીટીવી ફૂટેજ પર જ મદાર રાખવામાં આવે છે.આ માટે દરેક પરીક્ષા કેન્દ્ર પરથી પરીક્ષા પૂરી થતાની સાથે જ સીસીટીવી ફૂટેજનું રેકોર્ડિંગ સીડી અથવા ડીવીડી સ્વરુપે ડીઈઓ કચેરીમાં જમા કરાવવાનું રહોય છે.ફૂટેજની ચકાસણી માટે દર વર્ષની જેમ આ વર્ષે પણ ૪૦ શિક્ષકોને જવાબદારી સોંપવામાં આવી છે.હરણી વિસ્તારની સ્કૂલની કોમ્પ્યુટર લેબમાં તા.૫ માર્ચથી સીસીટીવી ફૂટેજની સીડી ચકાસવાનું શરુ કરાયું છે.મળતી વિગતો પ્રમાણે ધો.૧૦ અને ધો.૧૨ના ફૂટેજની ૮૦૦૦ જેટલી સીડીની ચકાસણી લગભગ એક મહિનામાં પૂરી કરાશે.આ ચકાસણીના આધારે જો કોઈ વિદ્યાર્થી પરીક્ષામાં ગેરરીતિ કરતો દેખાશે તો તેને નોટિસ મોકલીને ડીઈઓ કચેરી ખાતે સુનાવણીમાં બોલાવવામાં આવશે.વડોદરા શહેર જિલ્લામાં ધો.૧૦ અને ધો.૧૨ની પરીક્ષામાં અત્યાર સુધી ગેરરીતિનો એક પણ કેસ સામે આવ્યો નથી.
