વડોદરા,શેરબજારમાં થયેલી ખોટના કારણે દારૃના ધંધામાં ઝંપલાવનાર બૂટલેગર મનોજ પાપડના આજે રિમાન્ડ પૂરા થતા તેને જેલમાં મોકલી આપવામાં આવ્યો છે.
લાલુ સિંધી નામની સંગઠીત ગેંગ બનાવી વિદેશી દારૃનું મજબૂત નેટવર્ક ઉભુ કરી કરોડોનો કારોબાર કરવાના બનાવમાં પોલીસે ગુજસીટોક હેઠળ ગુનો દાખલ કર્યા બાદ આ ગુનામાં સંડોવાયેલા આરોપી મનોજ ઉર્ફે પાપડની ધરપકડ કરી ૨૧ મી તારીખ સુધીના રિમાન્ડ લીધા હતા. આરોપી જેલમાં રહીને પણ દારૃનું નેટવર્ક ચલાવતો હોવાની વિગત બહાર આવી હતી. આરોપી વિરુદ્ધ છેલ્લા ૧૦ વર્ષમાં ૧૧ ગુનાઓ નોંધાયેલા છે, જેમાં શરીર સંબંધી ગુનાઓ અને પ્રોહિબિશનના કેસોનો સમાવેશ થાય છે. આજે રિમાન્ડ પૂરા થતા પોલીસે તેને કોર્ટમાં રજૂ કરતા જેલમાં મોકલી આપવામાં આવ્યો છે. તપાસ દરમિયાન તેની મિલકતોની માહિતી પણ પોલીસે મેળવી છે.
