'કોન્ટ્રાક્ટર પાસે ન તો આવડત છે, ન કામ પૂરૂ કરવાની ક્ષમતા' : બે-બે, ત્રણ-ત્રણ મહિના સુધી રસ્તાઓ ખોદીને ખાડા એમ જ પડયા રાખવામાં આવે છે જેનાથી લોકો ત્રાહિમામ પોકારી ગયા છે
જૂનાગઢ, : જૂનાગઢ શહેરમાં લાંબા સમયથી ચાલી રહેલા રસ્તાના કામોમાં ઘોર બેદરકારી, અતિશય ધીમી ગતિ અને ભ્રષ્ટાચારની ગંધ સામે સ્થાનિક ધારાસભ્ય સંજય કોરડીયાએ મોરચો માંડયો છે. શહેરમાં ખોદાયેલા રસ્તાઓ અને તેના કારણે જનતા ભોગવી રહેલી હાલાકી મુદ્દે ધારાસભ્યએ કમિશનરને રજૂઆત કરી તંત્ર અને કોન્ટ્રાક્ટરની મિલીભગત સામે આકરા પ્રહારો કર્યા છે અને તાત્કાલિક શિક્ષાત્મક પગલાં ભરવા માંગ કરી છે.
મનપાના ભાજપ શાસકો સામે ભાજપના જ ધારાસભ્યએ આક્રોશ વ્યક્ત કર્યો છે કે, શહેરમાં રોડ બનાવવા માટેનો કોન્ટ્રાક્ટ ઘણા સમયથી આપી દેવાયો છે પરંતુ રસ્તાઓની વર્તમાન પરિસ્થિતિ અત્યંત ખરાબ છે. આટલું મોટું કામ જે કોન્ટ્રાક્ટરને સોંપાયું છે તેની પાસે આ કામ પુરૂ કરવાની કોઈ ક્ષમતા કે આવડત હોય તેવું દેખાતું નથી. કલાકો કે દિવસો નહીં પણ બે-બે, ત્રણ-ત્રણ મહિના સુધી રસ્તાઓ ખોદીને ખાડા એમ જ પડયા રાખવામાં આવે છે જેનાથી લોકો ત્રાહિમામ પોકારી ગયા છે. તેમણે સવાલ ઉઠાવ્યો છે કે આટલી નબળી કામગીરી છતાં અધિકારીઓ કોન્ટ્રાક્ટર પાસેથી કેમ કામ લેતા નથી ? મ્યુનિસિપલ કમિશનર આ મામલે પોતાની જવાબદારી સમજીને તાત્કાલિક કડક કાર્યવાહી કરે અને કરેલી કાર્યવાહીનો રિપોર્ટ સોંપે તેવી માંગ કરી છે.
સમગ્ર શહેરનું કામ એક જ એજન્સીને આપી દેવાયું છે અને કોઈ જ આયોજન વગર ગમે ત્યાં રસ્તાઓ ખોદી નાખવામાં આવે છે. ધારાસભ્યએ માગણી કરી છે કે જો એજન્સી સમયસર કામ પહોંચી વળવા સક્ષમ ન હોય, તો નિયમોનુસાર તેનો કોન્ટ્રાક્ટ તાત્કાલિક અસરથી રદ કરો.
