ગર્વમેન્ટ કોન્ટ્રાક્ટરને વ્યાજખોરની ધમકી
3 ટકા વ્યાજે લીધેલા 2.80 લાખ સામે 18.50 લાખ આપવા છતા વધુ રકમ માંગી ટ્રેક્ટર પડાવી ધમકી આપી
મોહનભાઇએ પોલીસને જણાવ્યું કે, ૨૦૨૩માં તેણે સાધુ વાસવાણી કુંજ રોડ પર મનપા દ્વારા રોડની સાઇડમાં વાવેલા ફુલ-ઝાડને ટ્રેક્ટર અને ટેન્કર વડે પાણી પીવડાવવાનું કામ રાખ્યું હતું. તે અવારનવાર માફક પાનની પાસે ચા-પાણી પીવા જતા હોવાથી દુકાનદાર પ્રતિપાલસિંહ સાથે ઓળખાણ થઇ હતી. આ સમયે આરોપીએ પોતે ફાઇનાન્સને લગતો વ્યવસાય કરતા હોવાનું અને રૂપિયાની જરૂર હોય તો કહે તેમ કહ્યું હતું. ત્યારબાદ તેણે મજુરોને પગાર ચુકવવા રૂપિયાની જરૂરિયાત ઉભી થતાં અલગ-અલગ સમયે રૂા.૨.૮૦ લાખ ૩ ટકા વ્યાજે લીધા હતા. જેનું તે વ્યાજ ચુકવતા હતા. નવેમ્બર ૨૦૨૩માં આરોપીએ આજી ડેમ પોલીસ મથક પાસે આવેલી તેની સાઇટે જઇને તમારે મને ૧ માસનું ૨.૪૦ લાખ વ્યાજ આપવાનું રહેશે. તેમ કહેતાં તેણે આરોપીને કે.કે.વી. હોલ પાસે રોકડા રૂા.૨.૪૦ લાખ આપ્યા હતા. ત્યારબાદ તેણે આરોપીને આટલુ વ્યાજ પોસાતું ન હોવાનું કહેતાં તેણે મહિને ૫૦ હજાર આપવા કહ્યું હતું. આથી તે અલગ-અલગ જગ્યાએ દર મહિને તેને વ્યાજ ચુકવતો હતો. એક હપ્તો લેટ થતાં આરોપીએ તેની સાઇટે જઇ ટ્રેક્ટર પડાવી લીધું હતું. આમ તેણે આરોપીને ૧૮.૫૦ લાખ આપ્યા હતા. ગઇ તા.૧૬-૧૨-૨૫નાં ફોન પર અને અમીનમાર્ગ પર રૂબરૂ મળી 'તારે રૂપિયા આપવાના છે કે નહીં નહીંતર તને ઉપાડી જઇશ'કહીં ધમકી આપી મારકુટ કરી હતી. તેણે તેના ભાઇને ફોન કરી જાણ કરતા આરોપીએ તેની સાથે પણ ગરેવર્તન કર્યું હતું. ત્યારબાદ પણ આરોપી ગાળો દઇ ધમકી આપતા અંતે ફરિયાદ નોંધાવી હતી.
