અમદાવાદના મેમકોમાં અસામાજિક તત્ત્વોનો આતંક, બર્થ ડે ઉજવીને રોડ બાનમાં લીધો, ટ્રાવેલ્સની ઓફિસમાં કરી તોડફોડ

Ahmedabad News : અમદાવાદમાં અસામાજિક તત્ત્વોનો આતંક વધી રહ્યો હોય તેવી ઘટના સામે આવી રહી છે. આરોપીઓને જાણે કાયદાનો ડર જ નથી રહ્યો, એ પ્રકારે ધારદાર હથિયાર સાથે હુમલો કરતાં હોવાના સીસીટીવી સામે આવતા હોય છે, ત્યારે શહેરના મેમકો વિસ્તારમાં મારુતિ કૃપા ટ્રાવેલ્સની ઓફિસમાં કેટલાક અસામાજિક તત્ત્વોએ હુમલો કરીને તોડફોડ કરી હતી. સમગ્ર ઘટના સીસીટીવીમાં કેદ થઈ હતી. આ મામલે શહેરકોટડા પોલીસે ગુનો નોંધીને વધુ તપાસ હાથ ધરી છે. 

મળતી માહિતી મુજબ, અમદાવાદ શહેરના મેમકો વિસ્તારમાં કેટલાક અસામાજિક તત્ત્વો જાહેર રોડ પર જન્મદિવસની ઉજવણી કરી રહ્યા હતા. આ દરમિયાન સાઈડમાં ખસવાનું કહેતા અસામાજિક તત્ત્વોએ ટ્રાવેલ્સની ઓફિસમાં ભારે તોડફોડ કરીને ધમાલ મચાવી હતી. જેમાં ઓફિસમાં ઘૂસી આવેલા લોકોએ કમ્પ્યુટર, ખુરશી સહિતની વસ્તુને નુકસાન પહોંચાડ્યું હતું. 

આ પણ વાંચો: વિરમગામ શહેરમાં અડધી રાત્રે જાહેર રસ્તા પર બર્થડે ઉજવણી, આતશબાજી સાથે કેક કાપવાનો વીડિયો વાયરલ

આ ઉપરાંત એક શખસના હાથમાં છરી જોવા મળે છે. સમગ્ર ઘટના સીસીટીવી કેમેરામાં કેદ થઈ હતી. હુમલાની ઘટના મામલે શહેરકોટડા પોલીસ સ્ટેશનમાં ગુનો દાખલ કરવામાં આવ્યો છે. પોલીસે સીસીટીવીના આધારે વધુ તપાસ હાથ ધરી છે.