Ahmedabad News: અમદાવાદના વેજલપુર વિસ્તારમાં આવેલા ગાંધી હોલ નજીક એક ચોંકાવનારી ઘટના સામે આવી છે. અહીં ખરીદી કરવા આવેલી એક મહિલા પર અન્ય બે થી ત્રણ અજાણી મહિલાઓએ અચાનક હુમલો કરી તેને ગંભીર ઈજાઓ પહોંચાડી હતી. આ ઘટનાને પગલે સમગ્ર વિસ્તારમાં ચકચાર મચી ગઈ છે.
શું છે સમગ્ર ઘટના?
મળતી માહિતી અનુસાર, ભોગ બનનાર મહિલા ગાંધી હોલ ખાતે આયોજિત કોઈ પ્રદર્શન અથવા સેલમાં ખરીદી કરવા માટે આવી હતી. આ દરમિયાન કોઈ અગમ્ય કારણોસર બેથી ત્રણ મહિલાઓએ ટોળું વળીને આ મહિલા પર તૂટી પડી હતી. હુમલો એટલો જોરદાર હતો કે મહિલાને તાત્કાલિક સારવાર માટે હોસ્પિટલ ખસેડવાની ફરજ પડી હતી. હુમલો કર્યા બાદ તમામ આરોપી મહિલાઓ ઘટનાસ્થળેથી નાસી છૂટવામાં સફળ રહી હતી.
સીસીટીવીના અભાવે તપાસમાં અડચણ
ઘટનાની જાણ થતા જ વેજલપુર પોલીસ કાફલો ઘટનાસ્થળે દોડી આવ્યો હતો. પોલીસે ગુનો નોંધીને તપાસના ચક્રો ગતિમાન કર્યાં છે. જોકે, પોલીસ તપાસમાં એક મોટી બેદરકારી સામે આવી છે. ગાંધી હોલ જેવા મોટા ઈવેન્ટ સ્થળ પર પૂરતા પ્રમાણમાં સીસીટીવી કેમેરા લગાવવામાં આવ્યા નથી. જે પૂરતા પ્રમાણમાં CCTV ન હોવાથી આરોપીઓની સ્પષ્ટ ઓળખ કરવામાં પોલીસને મુશ્કેલી પડી રહી છે.
