Ahmedabad Student Writing with Feet: ધોરણ 10 અને 12ની બોર્ડની પરીક્ષાઓ ગુરુવારથી શરૂ થઈ રહી છે, ત્યારે અમદાવાદના ધોરણ 10ના એક દિવ્યાંગ વિદ્યાર્થીએ અનોખો આત્મવિશ્વાસ દાખવ્યો છે. આ વિદ્યાર્થીના બંને હાથ કામ કરતા ન હોવા છતાં, તેણે રાઈટર(લખનાર મદદનીશ)ની મદદ લેવાનો ઇનકાર કર્યો છે અને બોર્ડની તમામ વિષયની પરીક્ષાઓ તે પગે લખીને જ આપશે. બીજી તરફ, અમદાવાદ શહેર અને ગ્રામ્ય બંને ડીઈઓ(DEO) કચેરી દ્વારા આજે બોર્ડ પરીક્ષાના સુચારુ સંચાલન માટેનો એક્શન પ્લાન પણ જાહેર કરવામાં આવ્યો છે.
અદમ્ય આત્મવિશ્વાસ: 60 ટકા દિવ્યાંગતા છતાં રાઈટરની મદદ લેવાનો ઈનકાર
શહેર ડીઈઓ(DEO) દ્વારા મળતી માહિતી મુજબ, ધોરણ 10ના એક વિદ્યાર્થીએ 60 ટકા દિવ્યાંગતા હોવા છતાં અને બંને હાથે લખી શકવા અસમર્થ હોવા છતાં રાઈટરની મદદ લેવાનો ઈનકાર કર્યો છે. ખોખરા વિસ્તારમાં રહેતો નીતિન શ્રીક્રિષ્ણ પાસવાન રાષ્ટ્રભારતી હિન્દી હાઈસ્કૂલમાં અભ્યાસ કરે છે અને બોર્ડની પરીક્ષા માટે તેનું કેન્દ્ર પણ આ જ સ્કૂલ છે.
નાનપણથી જ કરી પગ વડે લખવાની પ્રેક્ટિસ
નીતિનને જન્મથી જ હાથમાં તકલીફ હોવાથી તેના બંને હાથ કામ કરતા નથી. નિયમ મુજબ તેને રાઈટર મળી શકે તેમ હોવા છતાં, તેણે આત્મનિર્ભર રહીને પરીક્ષા આપવાનું નક્કી કર્યું છે. તે બોર્ડની આ પરીક્ષા પોતાના પગ વડે લખીને આપશે. નીતિને નાનપણથી જ પગ દ્વારા લખવાની પ્રેક્ટિસ કરી છે અને ધોરણ 1થી 10 સુધીની તમામ આંતરિક પરીક્ષાઓ પણ તેણે પગથી લખીને જ સફળતાપૂર્વક આપી છે.
શાળાઓએ પ્રવેશ ન આપ્યો, પણ નીતિને હાર ન માની
નીતિનનો આ સંઘર્ષ અને આત્મવિશ્વાસ ખરેખર પ્રશંસનીય છે. તેના પિતા ભઠ્ઠીમાં મજૂરી કામ કરે છે અને માતા અગરબત્તી બનાવીને પરિવારને આર્થિક ટેકો આપે છે. નીતિન મક્કમતા સાથે કહે છે કે, 'મારી તૈયારી સંપૂર્ણ છે અને મને વિશ્વાસ છે કે હું રાઈટરની મદદ વિના પણ પગ વડે લખીને સારી રીતે પરીક્ષા આપી શકીશ.' આશ્ચર્યની વાત તો એ છે કે, શરૂઆતમાં નીતિનને તેની શારીરિક સ્થિતિના કારણે અનેક ખાનગી શાળાઓએ પ્રવેશ આપવાનો ઈનકાર કરી દીધો હતો, પરંતુ આજે તે પોતાની મહેનતથી સૌના માટે ઉદાહરણ બન્યો છે.
આ પણ વાંચો: ખનીજ માફિયાઓ પર દરોડાના ગુજરાત સરકારના ફક્ત નાટકો! ફરિયાદ નોંધી પણ લીઝ રદ ના કરી
દિવ્યાંગ અને ઈજાગ્રસ્ત વિદ્યાર્થીઓ માટે ખાસ વ્યવસ્થા
અમદાવાદ શહેર ડીઈઓ(DEO) કચેરી દ્વારા ધોરણ 10માં 108 અને ધોરણ 12માં 78 મળીને કુલ 186 વિદ્યાર્થીઓને રાઈટરની મંજૂરી આપવામાં આવી છે. આ વિદ્યાર્થીઓમાં પ્રજ્ઞાચક્ષુ, ગંભીર બીમારીને કારણે દિવ્યાંગતા ધરાવતા અથવા અકસ્માતને લીધે હાથમાં ફ્રેક્ચર થયું હોય તેવા પરીક્ષાર્થીઓનો સમાવેશ થાય છે. બીજી તરફ, અમદાવાદ ગ્રામ્ય ડીઈઓ કચેરી દ્વારા ધોરણ 10માં 38 અને ધોરણ 12માં 16 સહિત કુલ 54 વિદ્યાર્થીઓને રાઈટરની મદદ લેવા માટે સત્તાવાર પરવાનગી અપાઈ છે.
