Ahmedabad Crime News: અમદાવાદમાં નશાના કારોબાર સામે લાલઆંખ કરતા સ્પેશિયલ ઓપરેશન ગ્રુપ (SOG)એ બાપુનગર વિસ્તારમાં સપાટો બોલાવ્યો છે. SOGની ટીમે બાપુનગરના બે અલગ-અલગ સ્થળોએ દરોડા પાડીને 8 કિલોથી વધુ ગાંજાનો જથ્થો ઝડપી પાડ્યો છે. આ મામલે પોલીસે બે શખસોની ધરપકડ કરી કાયદેસરની કાર્યવાહી હાથ ધરી છે.
4.12 લાખ રૂપિયાનો મુદ્દામાલ જપ્ત
મળતી માહિતી અનુસાર, SOGની ટીમને મળેલી ચોક્કસ બાતમીના આધારે બાપુનગરમાં આવેલી મણીલાલ મથુરદાસની ચાલીમાં રેહાન મસ્જિદ સામેના એક તૂટેલા મકાન તેમજ સત્યમ ફ્લેટના ગ્રાઉન્ડ ફ્લોર પર દરોડો પાડવામાં આવ્યો હતો. 8 કિલો 142 ગ્રામ ગાંજા સહિત અન્ય ચીજવસ્તુઓ મળી કુલ 4,12,950 રૂપિયાનો મુદ્દામાલ કબજે કરવામાં આવ્યો છે.
આ પણ વાંચો: 'આ વખતે પોલીસને મહિલાઓ સવાલ કરશે, હું નહીં...', વાવ-થરાદમાં જિજ્ઞેશ મેવાણીનો હુંકાર
ઝડપાયેલા આરોપીઓની વિગત
પોલીસે આ ગુનામાં 30 વર્ષીય મોહમ્મદ તાહીર અબ્દુલ કરીમ ભુરજી અને 31 વર્ષીય કરણ કોકુલવારની ધરપકડ કરી છે. ઝડપાયેલા બંને શખસો અગાઉ પણ પોલીસ ચોપડે ચડી ચૂક્યા છે. ખાસ કરીને મુખ્ય આરોપી મોહમ્મદ તાહીર સામે ગંભીર ગુનાઓ નોંધાયેલા છે. તેના પર અગાઉ ચોરી, ઘરફોડ ચોરી અને પ્રોહિબિશનના ગુનાઓમાં સંડોવાયેલો છે. વર્ષ 2019-20માં તેને બાપુનગર વિસ્તારમાંથી તડીપાર પણ કરવામાં આવ્યો હતો. કરણ કોકુલવાર સામે પણ વર્ષ 2024માં ગુનો નોંધાઈ ચૂક્યો છે. હાલ આ કેસમાં આરોપીઓ આટલો મોટો જથ્થો ક્યાંથી લાવ્યા હતા અને કોને સપ્લાય કરવાના હતા તે દિશામાં SOGએ ઊંડાણપૂર્વકની તપાસ શરૂ કરી છે.
