Ahmedabad News : શહેરના રખિયાલ વિસ્તારમાં બુધવારે ધોળા દિવસે એક યુવક પર તીક્ષ્ણ હથિયારો વડે જીવલેણ હુમલો કરવામાં આવતા સ્થાનિકો અને રાહદારીઓમાં ભારે ફફડાટ વ્યાપી ગયો હતો. પોલીસ અધિકારીઓના જણાવ્યા અનુસાર, આ ઘટના અજીત મિલ ચાર રસ્તા પાસે મણિયાર ટેલર કંપની નજીક જાહેર રોડ પર બની હતી.
ભરચક વિસ્તારમાં હુમલાથી લોકોમાં ફફડાટ
પ્રાથમિક વિગતો મુજબ, હુમલાખોરોએ તલવારો અને અન્ય ઘાતક હથિયારો વડે યુવક પર ઘાતક હુમલો કર્યો હતો. નવાઈની વાત એ છે કે, હુમલાખોરોએ પોલીસને ખુલ્લેઆમ પડકાર ફેંકી ઘટનાસ્થળેથી નાસી છૂટ્યા હતા. ભરચક વિસ્તારમાં અચાનક થયેલા આ હિંસક હુમલાને કારણે નાસભાગ મચી ગઈ હતી અને આસપાસના લોકો જીવ બચાવવા દોડતા જોવા મળ્યા હતા.
યુવકને સારવાર માટે ખસેડાયો
આ હુમલામાં યુવકને ગંભીર ઈજાઓ પહોંચી હતી, તેને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો. ડોક્ટરોના જણાવ્યા મુજબ હાલ યુવકની હાલત અત્યંત નાજુક છે.
અસામાજિક તત્ત્વોનો પોલીસને પડકાર
ઘટનાની જાણ થતા જ રખિયાલ પોલીસનો કાફલો ઘટનાસ્થળે દોડી આવ્યો હતો અને સમગ્ર વિસ્તારને કોર્ડન કરી લીધો હતો. હુમલાખોરોની ઓળખ કરવા અને ઘટનાક્રમને સમજવા માટે આસપાસની કંપનીઓ અને દુકાનોના સીસીટીવી (CCTV) ફૂટેજની તપાસ કરવામાં આવી રહી છે.
હુમલાખોર વિશે હજુ કોઈ માહિતી નહીં
એક વરિષ્ઠ પોલીસ અધિકારીએ જણાવ્યું હતું કે, ‘હુમલા પાછળનો હેતુ અને હુમલાખોરો કોણ હતા તે હજુ સુધી જાણી શકાયું નથી. અમે તમામ પાસાં પર તપાસ કરી રહ્યા છીએ.’ પોલીસે આરોપીઓને વહેલી તકે ઝડપી પાડવા માટે અલગ-અલગ ટીમો બનાવી તપાસ તેજ કરી છે.
