Gujarat Local Body Elections 2026: અમદાવાદ મ્યુનિસિપલ કોર્પોરેશનની ચૂંટણી માટે વહીવટી તંત્ર દ્વારા મતદારોની અંતિમ યાદી અને આંકડા જાહેર કરવામાં આવ્યા છે. શહેરના કુલ 48 વોર્ડમાં આ વખતે કુલ 37.99 લાખ મતદારો મતાધિકારનો ઉપયોગ કરશે. આ આંકડાઓમાં સૌથી આકર્ષક બાબત એ છે કે શહેરના બે પ્રતિષ્ઠિત વોર્ડમાં પુરુષોની સરખામણીએ મહિલા મતદારોની સંખ્યા વધારે નોંધાઈ છે.
જાતિગત સમીકરણો: ક્યાં કોનું પલ્લું ભારે?
શહેરમાં કુલ 19.66 લાખ પુરુષ મતદારો અને 18.32 લાખ મહિલા મતદારો નોંધાયા છે. જોકે, નવરંગપુરા અને પાલડી એવા બે વોર્ડ છે જ્યાં મહિલા મતદારોની સંખ્યા પુરુષો કરતા વધુ છે. નવરંગપુરામાં 33,812 પુરુષ સામે 34,715 મહિલા મતદારો. પાલડીમાં 36,543 પુરુષ સામે 36,707 મહિલા મતદારો. જ્યારે જોધપુર વોર્ડમાં સ્ત્રી-પુરુષ મતદારોની સંખ્યા લગભગ સમાન જેવી છે, જેમાં 44,034 પુરુષ અને 44,022 મહિલા મતદારોનો સમાવેશ થાય છે.
સૌથી વધુ મતદારો નિકોલ વોર્ડ 1.27 લાખ મતદારો સાથે પ્રથમ ક્રમે છે, જ્યારે વટવા વોર્ડ 1.10 લાખ મતદારો સાથે બીજા ક્રમે છે. ઓઢવ વોર્ડમાં સૌથી ઓછા એટલે કે માત્ર 56,183 મતદારો નોંધાયા છે.
ઓછા મતદાનની ચિંતા
નવા આંકડાઓ સાથે એક ચિંતાજનક પાસું પણ સામે આવ્યું છે. છેલ્લી ત્રણ સ્થાનિક સ્વરાજ્યની ચૂંટણીઓના ટ્રેન્ડ મુજબ અમદાવાદમાં મતદાનનું પ્રમાણ સતત 50 ટકાથી ઓછું નોંધાયું છે. આ વખતે તંત્ર અને રાજકીય પક્ષો મતદારોને ઘરની બહાર લાવી મતદાનનું પ્રમાણ વધારવા માટે કેવા પ્રયાસો કરે છે તે જોવું રહ્યું. હાલમાં તમામ 48 વોર્ડમાં ચૂંટણીલક્ષી ગતિવિધિઓ તેજ બની છે અને મતદારોની આ યાદી મુજબ ઉમેદવારો પોતપોતાની વ્યૂહરચના ઘડી રહ્યા છે.
