Ahmedabad Accident: અમદાવાદના એસ.જી. હાઈવે પર ફરી એકવાર હિટ એન્ડ રનની ઘટના સામે આવી છે. એસ.જી. હાઈવે પર આવેલા સોલા ભાગવતથી ઈસ્કોન ચાર રસ્તા તરફ જતા બ્રિજ પર ગત મોડી રાત્રે એક અજાણ્યા વાહને બાઈકસવારને અડફેટે લીધો હતો. આ અકસ્માતમાં 32 વર્ષીય બાઈકસવાર યુવકનું ઘટનાસ્થળે જ મોત નીપજ્યું હતું.
ટક્કર મારી વાહન ચાલક ફરાર
મળતી માહિતી અનુસાર, ગત મોડી રાત્રે 32 વર્ષીય અક્ષર ગજ્જર બાઈક લઈને સોલા ભાગવતથી ઇસ્કોન તરફ જતા ઓવરબ્રિજ પરથી પસાર થઈ રહ્યો હતો. આ દરમિયાન પાછળથી પૂરપાટ ઝડપે આવી રહેલા એક અજાણ્યા વાહનના ચાલકે બાઈકને જોરદાર ટક્કર મારી હતી. અકસ્માત એટલો સર્જાયો હતો કે યુવક રોડ પર પટકાતાં તેને ગંભીર ઈજાઓ પહોંચી હતી અને તેનું મોત થયું હતું. અકસ્માત સર્જ્યા બાદ અજાણ્યો વાહનચાલક ઘટનાસ્થળેથી ફરાર થઈ ગયો હતો.
ઘટનાની જાણ થતાં જ પોલીસ કાફલો ઘટનાસ્થળે દોડી ગયો હતો અને મૃતદેહને પોસ્ટમોર્ટમ અર્થે હોસ્પિટલ ખસેડ્યો હતો. પોલીસે આ મામલે અજાણ્યા વાહન ચાલક વિરૂદ્ધ ગુનો નોંધીને કાયદેસરની કાર્યવાહી હાથ ધરી છે.
