સેલ્ફ ડ્રાઇવના નામે કાર લઇ ગઠિયો રફુચક્કર, બે દિવસ બાદ ફોન બંધ થઈ જતા માલિક ઠગાયા

Vadodara Car Rent Scam : કાર ભાડે લેવાના બહાને છેતરપિંડીના અનેક કિસ્સાઓ બની રહ્યા છે અને ગઠીયા પકડાઈ રહ્યા હોવા છતાં હજી આ પ્રકારના બનાવો બની રહ્યા છે. આવા જ એક કિસ્સામાં વડોદરાના યુવકે થાર ગાડી ગુમાવી છે. 

ન્યુ વીઆઈપી રોડ પર રાજીવ નગરમાં રહેતા અને રેડીમેટ ગારમેન્ટની દુકાન ધરાવતા ધર્મેશ પ્રજાપતિએ પોલીસને કહ્યું છે કે મારા પિતાએ થાર ગાડી લીધી હતી પરંતુ તેનો વધુ ઉપયોગ નહીં થતો હોવાથી મારા મિત્ર કરણ તડવીના કહેવાથી આ ગાડી સેલ્ફ ડ્રાઇવ માટે ભાડે આપવાનું નક્કી કર્યું હતું. કરણે આ બાબતે તેના સોશિયલ મીડિયાના એકાઉન્ટ પર જાહેરાત મૂકી હતી. 

ગઈ તા.13મી માર્ચે જયેશ ભુપેન્દ્રભાઈ પરમાર (સમિયાલા ગામ, વડોદરા) નામના એક યુવકે દમણ જવા માટે બે દિવસ કાર માગી હતી અને એક દિવસનું રૂ.6,500 લેખે ભાડું નક્કી કર્યું હતું. તા.15મી એ ફતેગંજ વિસ્તારમાં તેની પાસે કાગળ ઉપર સહી કરાવી તેના ઓળખ પત્ર લઇ કાર આપવામાં આવી હતી. પરંતુ બે દિવસ બાદ તેનો કોઈ પત્તો લાગ્યો ન હતો અને ફોન પણ બંધ થઈ ગયો હતો. જેથી ફતેગંજ પોલીસને જાણ કરતા જયેશ પરમાર સામે ગુનો નોંધી તપાસ હાથ ધરી છે.