પીંપળજ પાસે ખાણ ખનીજની ચેકપોસ્ટ ઉપર જ રેતી ભરેલુ ડમ્પર પલટી ગયું!

ગાંધીનગર મહુડી હાઇવે ઉપર

સરકારી કારનો કચ્ચરઘાણ વળી ગયો ઃ ચેકપોસ્ટ કન્ટેનરને પણ નુકસાન ઃ ડમ્પર મૂકી ચાલક ફરાર થઈ ગયો

ગાંધીનગર જિલ્લામાં રેતી ચોરીને અટકાવવા માટે અલગ અલગ વિસ્તારોમાં ચેકપોસ્ટ ઉભી કરવામાં આવી છે ત્યારે ઘણી વખત અહીંના કર્મચારીઓ ઉપર હુમલાની ઘટના બહાર આવી છે ત્યારે આ વખતે ગાંધીનગર નજીક મહુડી હાઇવે ઉપર પીપળજ પાસે ચેકપોસ્ટ ઉપર આખે આખું રેતી ભરેલું ડમ્પર જ પલટી ખાઈ ગયું હોવાની ઘટના બહાર આવી છે. જે ઘટના સંદર્ભે પોલીસ સૂત્રોમાંથી મળતી વિગતો પ્રમાણે પીંપળજ ગામ પાસે, બી.આર.વાઘેલા ફાર્મની સામે ખનીજ ખાતાની ચેકપોસ્ટ આવેલી છે. સોમવારની સવારે એક ડમ્પરના ચાલકે પૂર ઝડપે ડમ્પર હંકારીને ત્યાં ચેકપોસ્ટ પાસે સરકારી કાર ઉપર પલટી ખાઈ ગયું હતું અને તેના કારણે આ કારનો કચ્ચરઘાણ વળી ગયો હતો. એટલું જ નહીં ચેકપોસ્ટના કન્ટેનરને પણ નુકસાન પહોંચ્યું હતું સદનસીબે આ સમયે કર્મચારીઓ બોલેરો કારમાં હાજર ન હોવાથી મોટી જાનહાની ટળી હતી તો અકસ્માતની આ ઘટનાને પગલે હાજર કર્મચારીઓ દોડી આવ્યા હતા ત્યારે ડમ્પરનો ચાલક ત્યાંથી ભાગી જવામાં સફળ રહ્યો હતો. ઘટના સમયે હાજર સિક્યુરિટી ગાર્ડ પંકજસિંહ રાઠોડે આ અંગેની જાણ ઉચ્ચ અધિકારીઓને કરી હતી. આ મામલે ખનીજ ખાતામાં રોયલ્ટી ઇન્સ્પેક્ટર તરીકે ફરજ બજાવતા તરૃણભાઈ કમલકિશોર શર્માએ પેથાપુર પોલીસ સ્ટેશનમાં અજાણ્યા ડમ્પર ચાલક વિરુદ્ધ ફરિયાદ નોંધાવી છે. અગાઉ પણ ખાણ ખનીજ વિભાગના અધિકારીઓ ઉપર હુમલાની ઘટના બની છે ત્યારે આ અકસ્માત છે કે પછી કોઈ ષડયંત્ર તે દિશામાં પણ પોલીસ દ્વારા તપાસ કરવામાં આવી રહી છે.