કાળઝાળ ગરમીમાં ડ્રાઇવિંગ લાઇસન્સ ટેસ્ટ માટે વડોદરા આરટીઓ કચેરીએ પહોંચેલા અરજદારોને આજેફરી એકવખત નિરાશ થઈ ખાલી હાથે પરત ફરવું પડ્યું હતું.
સવારથી જ જિસ્વાન ઈન્ટરનેટ કનેક્ટિવિટી ઠપ થઈ જતાં આખો દિવસ ડ્રાઇવિંગ ટેસ્ટની કામગીરી સંપૂર્ણ બંધ રહી હતી. સાંજ સુધી કનેક્ટિવિટિ પુનઃસ્થાપિત ન થતાં અંતે તમામ એપોઇન્ટમેન્ટ રિ-શિડ્યૂલ કરવી પડી હતી. માત્ર એક અઠવાડિયા પહેલાં જ આ જ જિસ્વાન ઇન્ટરનેટ કનેક્ટિવિટિની સમસ્યાને કારણે અરજદારો વિલા મોઢે પરત ફર્યા હતા ત્યારે ફરી એ જ સ્થિતિ સર્જાતાં અરજદારોમાં ભારે રોષ જોવા મળ્યો હતો. આજેટુ-વ્હીલર માટેની ૨૫૯ અને ફોર-વ્હીલર માટેની ૧૭૪ મળી કુલ ૪૩૩ એપોઇન્ટમેન્ટ રિ-શિડ્યૂલ કરવી પડી છે. આ તમામ અરજદારોને હવે અલગ અલગ દિવસે નવી એપોઇન્ટમેન્ટ આપવામાં આવી છે. પરંતુફરી આ જ સ્થિતિ ઊભી થશે કે કેમ તે અંગે અરજદારો ચિંતિત છે. સૌથી વધુ મુશ્કેલી તે અરજદારોને થઈ જેઓ વડસર, મકરપુરા, ગોધરા સહિત દૂર-દૂરના વિસ્તારોમાંથી લાંબું અંતર કાપીને આવ્યા હતા.
શિનોરથી ૬૦ કિ.મી. અંતર કાપીને આવેલા એક અરજદારે વ્યથા ઠાલવી હતી કે, સવારથી આવ્યો છું, સાંજ સુધી રોકાયો કામ શરૂ થશે એ આશાએ, પણ હવે ટ્રેક્ટર લઈને ખાલી હાથે પાછા જવાનો વારો આવ્યો છે. ફરી એપોઈન્ટમેન્ટ આપી છે, ત્યારે આવું ન થાય તો સારું. કામ ધંધો છોડીને આવ્યા હોવાથી મોંઘવારીમાં બહુ તકલીફ થાય છે.
