Vadodara News: વડોદરામાં ચાર મહિલાઓ દ્વારા સોસાયટી પાસે રહેતા શ્વાનના ત્રણ ગલુડિયાને કોથળામાં ભરી કારમાં લઈ જવાયા હોવાનો એક વીડિયો સોશિયલ મીડિયામાં વાઈરલ થયો છે. આ મામલે એનિમલ વેલફેરની એનજીઓ ચલાવતા અમદાવાદ ગુજરાત યુનિવર્સિટીના લેક્ચરરે અજાણી મહિલાઓ સામે બાપોદ પોલીસ સ્ટેશનમાં ફરિયાદ નોંધાવી છે.
ગુજરાત યુનિવર્સિટીમાં સમાજ વિદ્યાભવન ખાતે લેકચરર તરીકે નોકરી કરતા સમીરભાઈ ચંદુભાઈ ગજ્જર(રહે. ઘાટલોડિયા અમદાવાદ) દ્વારા બાપોદ પોલીસ સ્ટેશનમાં ફરિયાદ નોંધાવી છે. ફરિયાદમાં તેમણે જણાવ્યું છે કે, 'હું એનિમલ વેલફેરની એનજીઓમાં સ્વયંસેવક તરીકે પણ કામ કરું છું. વડોદરામાં રહેતા અને એનિમલ વેલ્ફેરનું કામ કરતા મહિલાએ મને એક વીડિયો મોકલ્યો હતો. જેમાં ગત 15 એપ્રિલ, 2026ની સાંજે 6:30 વાગે રઘુકુળ સ્કૂલ પાસે પંચમ ડુપ્લેક્સ પાસે ત્રણ ગલુડિયાઓને કોથળામાં ભરી કાર ચાલક લઈ ગયો હતો.'
વધુમાં તેમણે જણાવ્યું કે, 'વાઈરલ વીડિયો મામલે અમારા સભ્યો દ્વારા તપાસ કરતા ગલુડિયાઓ મળી આવ્યા ન હતા. અંતે આ મામલે પોલીસમાં ફરિયાદ નોંધાવવામાં આવી છે.'
કોથળામાં ગલુડિયાના પૂરનાર મહિલાઓ કોણ છે અને કારચાલકને લઈને પોલીસે વાઈરલ વીડિયાના આધારે વધુ તપાસ હાથ ધરી છે.
