અમદાવાદ: બોપલના ગોડાઉનમાંથી 18.72 લાખના ઇલેક્ટ્રિક વાયરની ચોરી, CCTVના છેડા કાપી કર્યો હાથફેરો
Summarized by AI; it may make mistakes. Check important info
Summarized by AI; it may make mistakes. Check important info
Ahmedabad News : અમદાવાદના બોપલ વિસ્તારમાં આવેલી એક નિર્માણાધીન સાઇટના ગોડાઉનમાંથી લાખો રૂપિયાની કિંમતના ઇલેક્ટ્રિક કોપર વાયરની ચોરી થવાનો મોટો બનાવ સામે આવ્યો છે. અજાણ્યા તસ્કરોએ સીસીટીવી કેમેરાના વાયર કાપી નાખીને પૂર્વઆયોજિત કાવતરાના ભાગરૂપે આશરે રૂપિયા 18,72,990ની કિંમતના કોપર વાયરના 147 બંડલ ચોરી લીધા છે. આ અંગે પોલીસે ગુનો નોંધીને તસ્કરોને ઝડપી પાડવા કાર્યવાહી હાથ ધરી છે.
સાઇટ પર કામકાજ માટે ઉતાર્યો હતો 50 લાખનો માલ
આ ચોરી અંગે ચાંદખેડામાં રહેતા અને ઇલેક્ટ્રિકલ કોન્ટ્રાક્ટર તરીકે કામ કરતા અમિતકુમાર સવજીભાઈ પટેલે પોલીસ ફરિયાદ નોંધાવી છે. તેઓ બોપલમાં ડી.પી.એસ. સ્કૂલ રોડ પર આવેલી નિર્માણાધીન સાઇટ પર ઇલેક્ટ્રિકલ વાયરિંગનું કોન્ટ્રાક્ટનું કામ કરે છે.
ગત ફેબ્રુઆરી મહિનામાં કોપર વાયરના ભાવમાં સતત વધારો થતો હોવાથી તેમણે ડેવલપર દ્વારા મળેલા ફ્લેટ નંબર એ/104ના ગોડાઉનમાં અંદાજે 50 લાખ રૂપિયાનો ઇલેક્ટ્રિકલ કોપર વાયરનો સ્ટોક ઉતાર્યો હતો. આ માલમાંથી આશરે 15 લાખ રૂપિયાના વાયરનો વપરાશ થઈ ચૂક્યો હતો અને બાકીનો માલ ગોડાઉનમાં સુરક્ષિત રાખવામાં આવ્યો હતો, જ્યાં તસ્કરોએ નિશાન બનાવ્યું હતું.
ચોરે બંધ ફ્લેટમાં ઘૂસી CCTV બંધ કરીને વાયર ચોર્યા
ગત તારીખ 13 માર્ચ, 2026ના રોજ સાંજના સાડા છ વાગ્યાની આસપાસ કોન્ટ્રાક્ટર અમિતકુમાર ગોડાઉનને તાળું મારીને પોતાના ઘરે ગયા હતા. ત્યારબાદ અમુક કલરના વાયરની ઘટ પડતા જૂના માલની ગણતરી કરવા માટે 16 માર્ચ, 2026ના રોજ સવારે દસેક વાગ્યે તેઓ સાઇટ પર પહોંચ્યા ત્યારે ચોરીનો ખુલાસો થયો હતો.
આ પછી તેઓએ તપાસ કરતાં જાણવા મળ્યું હતું કે, અજાણ્યા શખસે 13મી તારીખની સાંજથી 16મી તારીખની સવાર વચ્ચેના સમયે ગોડાઉનમાં પ્રવેશ કર્યો હતો. ચોરે ડ્રોઇંગ રૂમમાંથી સ્ટોક રૂમમાં જતા CCTV કેમેરાનો વાયર કાપી નાખ્યો હતો અને ત્યારબાદ અલગ-અલગ કલરના કુલ 147 કોપર વાયરના બંડલની ચોરી કરી ત્યાંથી ફરાર થઈ ગયા હતા. ચોરાયેલા માલની કુલ કિંમત 18,72,990 રૂપિયા થાય છે. પોલીસે આ મામલે અજાણ્યા ચોર ઇસમો વિરુદ્ધ કાયદેસરની કાર્યવાહી હાથ ધરી છે.
