બરોડા ક્રિકેટ એસોસિએશન (બીસીએ)ની કેરટેકર બોડીની આજે યોજાયેલી ત્રીજી બેઠકમાં છેલ્લી બેઠક બાદ થયેલા વિવિધ ખર્ચને બહાલી અપાઈ છે. ઝવેરી લીગ ટુર્નામેન્ટમાં  દરેક એકેડેમી અથવા ક્લબને દરેક કેટેગરીમાં માત્ર એક જ ટીમ ઉતારવાની મંજૂરીનો નિર્ણય કરાયો છે.

સમિતિએ નોંધ્યું કે અન્ય મેદાનોની સરખામણીએ મોતીબાગ મેદાન પાછળનો ખર્ચ અસાધારણ રીતે વધુ છે. છેલ્લા કેટલાક દિવસોથી બીસીએના સ્ટાફ અને ક્યુરેટરોને મોતીબાગમાં પ્રવેશ ન મળવાના મુદ્દે પણ ચર્ચા થઈ હતી.

આ અંગે સચિવને મોતીબાગ ક્લબને સત્તાવાર બીસીએ સાથેની સંલગ્નતા અને તમામ ટુર્નામેન્ટમાં ભાગીદારી સમાપ્ત કરવાની જાણ કરવા તેમજ બીસીએની માલિકીના તમામ મશીનરી અને સાધનો તાત્કાલિક ખસેડવા માટે સહકાર આપવા જણાવાયું છે. આ નિર્ણયથી મોતીબાગ ક્લબના ખેલાડીઓના ભવિષ્ય અંગે પણ ચિંતા વ્યાપી છે.

સિઝન ૨૦૨૬-'૨૭ અંતર્ગત રણજી ટ્રોફી ટીમ માટે આર. પ્રસન્નાની હેડ કોચ તરીકે અને રાકેશ પટેલની પેસ બોલિંગ કોચ તરીકે નિમણૂક થઈ છે, જ્યારે અંડર-૨૩, અંડર-૧૯, અંડર-૧૬ તેમજ અંડર-૧૪ની ટીમ માટે હેડ કોચ અને બોલિંગ કોચ તરીકે નિમણૂંકો કરાઈ છે.