સલમાનની માતૃભૂમિ આખરે 13 નવેમ્બરે થિયેટર્સમાં રિલિઝ કરાશે

• ફિલ્મને સરકારની મંજૂરી મળી, સેન્સરબોર્ડની બાકી
• ફિલ્મમેકર્સે ભારત-ચીન સબંધો હકારાત્મક રીતે દર્શાવતાં સરકારી અમલદારોની ફિલ્મને લીલી ઝંડી

મુંબઇ : જેની લાંબા સમયથી રાહ જોવાઇ રહી છે તે સલમાન ખાનની ફિલ્મ માતૃભૂમિ હવે ૧૩ નવેમ્બરે થિયેટર્સમાં જોવા મળી શકે છે. લાંબા સમયથી સરકારી તુમારશાહીમાં અટવાયેલી ફિલ્મને આખરે સરકારના માહિતી ખાતા તરફથી લીલી ઝંડી મળી ગઇ છે.
જો કે, સેન્સર બોર્ડ સમક્ષ તેને રજૂ કરી તેનું પ્રમાણપત્ર મેળવવાની પ્રક્રિયા હજી બાકી હોઇ તેની રજૂઆત બાબતે ફિલ્મમેકર્સ નિશ્ચિત નથી. જો સેન્સર બોર્ડ ફિલ્મને એક મહિનામાં મંજૂરી આપે તો ફિલ્મમેકર્સ દિવાળી બાદ તેર નવેમ્બરે ફિલ્મને થિયેટર્સમાં રજૂ કરવા માંગે છે. ૨૦૨૦માં ભારત-ચીન વચ્ચે ગલવાનમાં થયેલી લડાઇની પશ્ચાદભૂમાં બનાવવામાં આવેલી આ ફિલ્મનું નામ અગાઉ બેટલ ઓફ ગલવાન રાખવામાં આવ્યું હતું જેને બદલી ફિલ્મમેકર્સે માતૃભૂમિ કર્યું હતું.
ઓરિજિનલ ફિલ્મમાં મોટા ફેરફારો કરી ભારત અને ચીનના સંબંધોને હકારાત્મક રીતે દર્શાવવામાં આવતાં ફિલ્મને આખરે સરકારી મંજૂરી મળી ગઇ છે.