Salman and Sangeeta: બોલિવૂડના સુપરસ્ટાર સલમાન ખાન અવારનવાર પોતાના લુક અને ફિટનેસના કારણે સોશિયલ મીડિયા પર ચર્ચાનું કેન્દ્ર બનતા હોય છે. તાજેતરમાં જ સલમાન ખાને ઇન્સ્ટાગ્રામ પર પોતાનો એક શર્ટલેસ એટલે કે ટોપલેસ ફોટો શેર કર્યો હતો. આ તસવીરમાં તેમનું અદભુત બોડી ટ્રાન્સફોર્મેશન અને ફિટનેસ જોઈને ચાહકો આશ્ચર્યચકિત થઈ ગયા છે. જોકે, આ પોસ્ટમાં સૌથી વધુ આકર્ષણનું કેન્દ્ર તેમની પૂર્વ ગર્લફ્રેન્ડ અને અભિનેત્રી સંગીતા બિજલાનીની પ્રતિક્રિયા રહી છે.
'Alone' અને 'Lonely' વચ્ચેનો તફાવત સમજાવ્યો
સલમાન ખાને શેર કરેલી તસવીરમાં તેઓ એક ડિમ લાઈટવાળા રૂમમાં સોફા પર બેઠેલા જોવા મળે છે. આ ફોટોની સાથે તેમણે એક રસપ્રદ કેપ્શન પણ લખ્યું હતું, જેમાં તેમણે ‘Alone’ અને ‘Lonely’ વચ્ચેનો ભેદ સમજાવવાનો પ્રયાસ કર્યો હતો. સલમાને લખ્યું કે, "પોતાની સાથે બે રીતે રહી શકાય છે. એક 'અલોન' અને બીજી 'લોનલી'. 'અલોન' એટલે કે પોતાની મરજીથી એકલા રહેવું, જ્યારે 'લોનલી'નો અર્થ એવો થાય કે જ્યારે કોઈ તમારી સાથે રહેવા ન માંગતું હોય. હવે આગળ તમારે શું કરવું છે તે તમારે પોતે જ નક્કી કરવાનું છે." તેમની આ ફિલોસોફિકલ પોસ્ટે સોશિયલ મીડિયા પર નવી ચર્ચા છેડી દીધી હતી.
સંગીતા બિજલાનીની કમેન્ટે ખેંચ્યું ધ્યાન
સલમાનની આ પોસ્ટ પર પ્રતિક્રિયા આપતા સંગીતા બિજલાનીએ કમેન્ટ બોક્સમાં “Uff!” લખીને ફાયરનું ઇમોજી પોસ્ટ કર્યું હતું. સંગીતાની આ કમેન્ટે નેટીઝન્સનું ધ્યાન આકર્ષિત કર્યું છે અને ચાહકો જૂના દિવસોને યાદ કરવા લાગ્યા છે. ઉલ્લેખનીય છે કે, 1980ના દાયકામાં સલમાન અને સંગીતા લાંબા સમય સુધી રિલેશનશિપમાં હતા. મીડિયા રિપોર્ટ્સ અનુસાર, બંનેના લગ્ન પણ નક્કી થઈ ગયા હતા અને લગ્નની કંકોતરીઓ પણ છપાઈ ગઈ હતી, પરંતુ કોઈ કારણસર આ સંબંધ આગળ વધી શક્યો ન હતો. જોકે, આજે પણ બંને વચ્ચે ખૂબ જ સૌહાર્દપૂર્ણ અને મિત્રતાભર્યા સંબંધો છે.
60ની ઉંમરે પણ અદભુત ફિટનેસ
સોશિયલ મીડિયા યુઝર્સ સલમાન ખાનની ફિટનેસના જોરદાર વખાણ કરી રહ્યા છે. ચાહકોનું કહેવું છે કે સલમાન 60 વર્ષની ઉંમરની નજીક હોવા છતાં તેમની ફિટનેસ અદભુત છે અને તેમને જોઈને ઉંમરનો અંદાજો લગાવવો મુશ્કેલ છે. ઘણા યુઝર્સે તેમને કમેન્ટ સેક્શનમાં "બોલિવૂડનો સુલતાન" પણ કહ્યા છે.
બ્રેકિંગ ન્યૂઝ બનતા સલમાને આપી સ્પષ્ટતા: 'મમ્મી પણ પૂછી રહી છે...'
સલમાનનો આ ફોટો અને કેપ્શન મીડિયામાં 'બ્રેકિંગ ન્યૂઝ' બની જતાં તેમણે ફરી એક પોસ્ટ શેર કરીને રમુજી અંદાજમાં સ્પષ્ટતા કરવી પડી હતી. સલમાને લખ્યું કે, "અરે, હું મારા પોતાના વિશે વાત નહોતો કરી રહ્યો. જ્યારે મારી પાસે આટલો સુંદર પરિવાર અને મિત્રો હોય, ત્યારે હું કેવી રીતે 'અલોન' હોઈ શકું? અને જ્યારે તમારા જેવા ચાહકોનો પ્રેમ અને દુઆઓ મારી સાથે હોય, ત્યારે હું કેવી રીતે 'લોનલી' અનુભવી શકું? હું તો ઈશ્વરનો સૌથી વધુ આભાર માનનારો વ્યક્તિ છું. ઘણીવાર હું લોકોની વચ્ચે રહીને કંટાળી જાઉં છું, એટલે માત્ર પોતાના માટે થોડો સમય કાઢું છું, બસ એટલું જ. આ વખતે હું ફોટો નથી મૂકી રહ્યો, કારણ કે તમે લોકોએ તેને બ્રેકિંગ ન્યૂઝ બનાવી દીધો છે. હવે તો મારી મમ્મી પણ પૂછી રહી છે કે - 'ક્યા હુઆ બેટા?' એટલે તમે બધા ચિલ મારો."
