એશોઆરામ છોડી વીજળી-ઈન્ટરનેટ પણ નહીં એવા ગામમાં રહે છે કેટરિના કૈફની માતા, 8 બાળકોને આપી ચૂકી છે જન્મ

Katrina Mother Devotes Life Offline: બોલિવૂડ અભિનેત્રી કેટરિના કૈફ પોતાના પુત્રના જન્મ પછી લાઇમલાઇટથી દૂર છે અને પરિવાર સાથે સમય વિતાવી રહી છે. પુત્રના જન્મ બાદ તાજેતરમાં સ્પોટ થતાં વધેલા વજનને કારણે તે ટ્રોલિંગનો ભોગ પણ બની હતી, જોકે સલમાન ખાન સહિત અનેક સિતારાઓ તેના સમર્થનમાં આવ્યા હતા. જોકે ગ્લેમરસ દુનિયાથી તદ્દન વિપરીત, કેટરિનાની માતા સુઝેન ટરકોટ એક પ્રેરણાદાયી અને સાદગીપૂર્ણ જીવન જીવી રહ્યાં છે, જેમણે સંઘર્ષો વચ્ચે એકલા હાથે 8 બાળકોનો ઉછેર કર્યો અને પોતાનું સમગ્ર જીવન સમાજસેવા માટે સમર્પિત કરી દીધું.

બાળપણ, વિખેરાયેલો પરિવાર અને એકલી માતાનો સંઘર્ષ

43 વર્ષીય કેટરિના કૈફનું મૂળ નામ કેટરિના રોઝમેરી ટરકોટ છે અને તેનો જન્મ બ્રિટિશ હોંગકોંગમાં થયો હતો. કેટરિના જ્યારે ઘણી નાની હતી ત્યારે જ તેના માતા-પિતા છૂટાછેડા લઈને અલગ થઈ ગયા હતા. વ્યવસાયે વકીલ અને સમાજસેવિકા એવી માતા સુઝેને એકલા હાથે તમામ 8 બાળકો (કેટરિના, તેની ત્રણ મોટી બહેનો, ત્રણ નાની બહેનો અને એક મોટો ભાઈ)ની જવાબદારી ઉપાડી. લંડનમાં મોડેલિંગ પ્રોજેક્ટ દરમિયાન ફિલ્મમેકર કૈઝાદ ગુસ્તાદની નજર પડતાં કેટરિનાને વર્ષ 2003માં 'બૂમ' ફિલ્મ દ્વારા બોલિવૂડમાં એન્ટ્રી મળી હતી.

2008માં ભારત આવી તમિલનાડુના ગામડાને બનાવ્યું કર્મભૂમિ

જ્યારે દીકરી બોલિવૂડની ટોચની સ્ટાર બની રહી હતી, ત્યારે માતા સુઝેન તમામ ભૌતિક સુખ-સુવિધાઓ છોડીને વર્ષ 2008માં લંડનથી ભારત આવી ગયાં. તેમણે તમિલનાડુના એક નાના અને પછાત ગામડામાં રહીને ગરીબ બાળકોને ભણાવવાનું શરૂ કર્યું. તેઓ 'રિલીફ પ્રોજેક્ટ્સ ઇન્ડિયા' નામનું એનજીઓ ચલાવે છે, જે સરકારી શાળાઓમાં ભણતા જરૂરિયાતમંદ બાળકોને સાંજે વિનામૂલ્યે ટ્યુશન પૂરું પાડે છે.

માઉન્ટેન વ્યુ સ્કૂલની સ્થાપના અને મર્યાદિત સંસાધનોમાં જીવન

• ટ્યુશન સેન્ટર બાદ સુઝેને વર્ષ 2015માં 'માઉન્ટેન વ્યુ સ્કૂલ'નો પાયો નાખ્યો, જ્યાં શરૂઆતમાં માત્ર 30 બાળકો હતા જે આજે વધીને 300થી વધુ થઈ ગયા છે.
• કેટરિના કૈફે એક મુલાકાતમાં જણાવ્યું હતું કે તેની માતા મદુરાઈ પાસેના જે અંતરિયાળ ગામડામાં રહે છે, ત્યાં દિવસમાં માત્ર અમુક કલાકો જ વીજળી આવે છે અને ઇન્ટરનેટ કનેક્ટિવિટી પણ ભાગ્યે જ મળે છે, જેના કારણે તે ઘણીવાર માતા સાથે ફોન પર પણ સરખી રીતે વાત કરી શકતી નથી.
• સુઝેનનું એનજીઓ આજે 25થી વધુ ગામડાઓમાં સક્રિય છે અને શિક્ષણ ઉપરાંત મહિલા સશક્તિકરણ, લાઇફ સ્કિલ ટ્રેનિંગ, કરિયર ગાઇડન્સ અને સર્વાઇકલ કેન્સર જાગૃતિ જેવા ક્ષેત્રોમાં મોટું કામ કરી રહ્યું છે. કેટરિના પણ આ બાળકો અને માતાના પ્રોજેક્ટ્સને આર્થિક રીતે મોટો ટેકો આપે છે.