'દ્રશ્યમ ધ કન્ક્લૂઝન' રિવ્યૂ: 2 ઑક્ટોબરનું જુઠ્ઠાણું પકડાયું? અજય દેવગન-જયદીપ અહલાવત વચ્ચે ખરાખરીનો જંગ!

Drishyam 3 The Conclusion Movie Review: અજય દેવગણ, જયદીપ અહલાવત, તબ્બુ અને પ્રકાશ રાજ સ્ટારર મોસ્ટ અવેઇટેડ ફિલ્મ 'દ્રશ્યમ 3: ધ કન્ક્લુઝન' 2 ઓક્ટોબરના રોજ સિનેમાઘરોમાં રિલીઝ થઈ ગઈ છે. 'શબ્દો જુઠ્ઠાણું છુપવાની જગ્યા શોધી લે છે, પરંતુ દ્રશ્ય ક્યારેય જૂઠું બોલતા નથી' - આ જ વિચાર સાથે વર્ષ 2015માં ગોવાના વિજય સાલગાંવકરે એક એવી રમત રમી હતી જેનાથી આખી પોલીસ અને સિસ્ટમ હલી ગઈ હતી. હવે આ જ રોમાંચક ચક્રવ્યૂહ સાથે વિજય ફરી વાર પડદા પર ઉતર્યો છે, જેને લઈને દર્શકોમાં ભારે ઉત્સાહ જોવા મળી રહ્યો છે.

શું છે ફિલ્મની કહાની?

આ ફિલ્મની કહાની વર્ષ 2022માં આવેલી 'દ્રશ્યમ 2' ના છેડા પકડીને આગળ વધે છે. તેથી 'દ્રશ્યમ 3' જોતા પહેલાં અગાઉની બે ફિલ્મો જોવી ખૂબ જરૂરી છે. ફિલ્મની શરૂઆત પોતાના પુત્ર સમીરને ખોનાર પૂર્વ આઈજી મીરા દેશમુખ (તબ્બુ)ની આત્મહત્યાના નિષ્ફળ પ્રયાસથી થાય છે. પત્નીની આ હાલત જોઈને તેના પતિ મહેશ દેશમુખ (રજત કપૂર) કેસ ફરી ખોલવાની વિનંતી કરે છે અને અહીંથી એન્ટ્રી થાય છે ક્રાઈમ બ્રાન્ચના ખતરનાક એસપી રાજવીર સિંહ તોમાર (જયદીપ અહલાવત) ની.

નવા પુરાવા અને નવો વળાંક

પોતાને 'શનિ' ગણાવનાર રાજવીર સિંહની નજર હવે વિજય સાલગાંવકર અને તેના પરિવાર પર પડે છે અને તેઓ ફરીથી પોલીસ, કેસ તથા કોર્ટના ચક્કરમાં ફસાઈ જાય છે. આ વખતે પોલીસ પાસે વિજયના જૂઠને સામે લાવવા માટે નવા પુરાવા, સાક્ષી અને કોઈ પણ કેસ ન હારનાર દિગ્ગજ વકીલ ઇન્દ્રજીત શેટ્ટી (પ્રકાશ રાજ) પણ છે. '2 ઓક્ટોબરના રોજ શું થયું હતું?' એ સવાલ બાદ હવે નવો સવાલ એ છે કે '23 જુલાઈના રોજ શું થયું હતું?'

ડિરેક્શન અને પટકથાની સમીક્ષા

સિનેમા પ્રેમીઓ જાણે છે કે આ ફિલ્મ મોહનલાલ સ્ટારર મલયાલમ ફ્રેન્ચાઇઝીની રીમેક છે, પરંતુ હિન્દીમાં આ વખતે કહાનીને તેનાથી અલગ રાખવામાં આવી છે. કો-રાઇટર અને ડાયરેક્ટર અભિષેક પાઠકે તેને નવેસરથી લખી છે. જો કે, કેસને બિલ્ડ કરવામાં તેઓ ઘણો સમય લે છે, પરંતુ ઇન્ટરવલ પછી જ્યારે કોર્ટરૂમ ડ્રામા શરૂ થાય છે ત્યારે અસલી રોમાંચ જોવા મળે છે. વળી, ઇન્સ્પેક્ટર ગાયતોંડે (કમલેશ સાવંત)ની કોમેડી અને દમદાર સંવાદો ફિલ્મમાં મનોરંજન જાળવી રાખે છે.

કલાકારોનો અભિનય

અભિનયની વાત કરીએ તો, અજય દેવગણે હંમેશાની જેમ વધારે બોલ્યા વગર પોતાની આંખો અને ઇન્ટેન્સ અંદાજથી અદભુત અભિનય કર્યો છે. જયદીપ અહલાવત અને પ્રકાશ રાજ પણ પોતાના પાત્રોમાં પ્રભાવશાળી સાબિત થાય છે. આ ઉપરાંત, સુધીર ચૌધરીની સિનેમેટોગ્રાફી, અમર મોહિલેનું બેકગ્રાઉન્ડ સ્કોર અને સંદીપ ફ્રાન્સિસનું એડિટિંગ ફિલ્મને વધુ મજબૂત બનાવે છે. વિજય સાલગાંવકર સાથે દર્શકોનો ભાવનાત્મક લગાવ જ આ ફિલ્મને મોટી જીત અપાવે છે.