પીએમ વિશ્વકર્મા યોજનાએ ત્રણ વર્ષ પૂર્ણ કર્યા: યોજના હેઠળ 30 લાખ કારીગરોની નોંધણી થઈ

સૂક્ષ્મ, લઘુ અને મધ્યમ ઉદ્યોગ મંત્રાલય (MSME),ભારત સરકાર દ્વારા પીએમ વિશ્વકર્મા યોજનાની ત્રીજી વર્ષગાંઠની ઉજવણી પશ્ચિમ બંગાળના કોલકાતા ખાતે કરવામાં આવી રહી છે. પ્રધાનમંત્રી વિશ્વકર્મા યોજના એ ભારત સરકારની એક મહત્વપૂર્ણ કલ્યાણકારી યોજના છે, જેનો શુભારંભ 17 સપ્ટેમ્બર 2023ના રોજ કરવામાં આવ્યો હતો. આ યોજનાનો મુખ્ય હેતુ પરંપરાગત કારીગરો અને શિલ્પકારોને આર્થિક સહાય, આધુનિક તાલીમ અને કૌશલ્ય પૂરું પાડીને તેમને સશક્ત બનાવવાનો છે. 

 યોજનાના મુખ્ય લાભો

• ઓળખ અને પ્રમાણપત્ર: લાભાર્થીઓને 'PM વિશ્વકર્મા સર્ટિફિકેટ' અને ડિજિટલ આઈડી કાર્ડ આપવામાં આવે છે, જેથી તેમને એક નવી ઓળખ મળે.
• કૌશલ્ય તાલીમ: કારીગરોને તેમના વ્યવસાય માટે 5 થી 7 દિવસની બેઝિક તાલીમ અને 15 દિવસ કે તેથી વધુ સમયની એડવાન્સ તાલીમ આપવામાં આવે છે.
• દૈનિક સ્ટાઇપેન્ડ: તાલીમ દરમિયાન લાભાર્થીઓને દરરોજ ₹500 નું સ્ટાઈપેન્ડ આપવામાં આવે છે.
• ટૂલકિટ સહાય: તાલીમની શરૂઆતમાં આધુનિક સાધનો ખરીદવા માટે ઈ-વાઉચરના સ્વરૂપમાં ₹15,000 સુધીની ટૂલકિટ સહાય મળે છે.
• સસ્તી લોન સહાય: વ્યવસાયને આગળ વધારવા માટે કોઈપણ ગેરંટી વગર કુલ ₹3 લાખ સુધીની લોન ખૂબ જ ઓછા વ્યાજ દરે આપવામાં આવે છે:
  • પ્રથમ તબક્કો: ₹1 લાખ સુધીની લોન (18 મહિનામાં પરત કરવાની રહે છે).
  • બીજો તબક્કો: ₹2 લાખ સુધીની લોન (30 મહિનામાં પરત કરવાની રહે છે).
• ડિજિટલ વ્યવહાર પ્રોત્સાહન: બિઝનેસમાં ઓનલાઈન પેમેન્ટને પ્રોત્સાહન આપવા માટે દરેક ડિજિટલ ટ્રાન્ઝેક્શન પર ઉત્તેજન રકમ આપવામાં આવે છે.

18  વ્યવસાયોનો સમાવેશ 

આ યોજના હેઠળ મુખ્યત્વે સુથાર, સોની, નાવિક, લુહાર, કુંભાર, વાળંદ, મોચી જેવા 18 પરંપરાગત વ્યવસાયો  સાથે જોડાયેલા લોકોને આવરી લેવામાં આવ્યા છે. 

પાત્રતા અને શરતો

• અરજદાર ભારતનો રહેવાસી હોવો જોઈએ અને નિર્ધારિત પરંપરાગત વ્યવસાય સાથે જોડાયેલ હોવો જોઈએ.
• અરજદારની ન્યૂનતમ ઉંમર 18 વર્ષ હોવી જરૂરી છે.
• પરિવારના માત્ર એક જ સભ્યને આ યોજનાનો લાભ મળી શકે છે (પરિવારમાં પતિ, પત્ની અને અવિવાહિત બાળકોનો સમાવેશ થાય છે).
• સરકારી નોકરી કરતા વ્યકિતના પરિવારજનો આ યોજના માટે પાત્ર નથી.
• જો અરજદારે અગાઉના 5 વર્ષમાં PM મુદ્રા લોન અથવા પીએમ સ્વનિધિ જેવી અન્ય કોઈ સમાન ક્રેડિટ યોજનાનો લાભ લીધો હોય, તો તે આ યોજના માટે પાત્ર બનશે નહીં.

પરીક્ષાલક્ષી પ્રશ્ન 

પ્રશ્ન 1: પ્રધાનમંત્રી વિશ્વકર્મા યોજનાનો મુખ્ય હેતુ શું છે?

A) મોટા ઉદ્યોગોને સસ્તી લોન આપવી

B) પરંપરાગત કારીગરો અને શિલ્પકારોને આર્થિક સહાય, તાલીમ અને કૌશલ્ય દ્વારા સશક્ત બનાવવા

C) સરકારી કર્મચારીઓને કૌશલ્ય તાલીમ આપવી

D) નિકાસ આધારિત ઉદ્યોગોને પ્રોત્સાહન આપવું