નાણા વર્ષના બીજા અર્ધવાર્ષિકમાં અર્થતંત્રની ગતિ ધીમી પડશે

અર્થતંત્રનું આગામી ચિત્ર મોટે ભાગે ચોમાસા, ખાદ્ય ફુગાવા, ક્રૂડ અને અન્ય કોમોડિટી પર આધારિત રહેશે
અમદાવાદ : ઓગસ્ટ ૨૦૨૬માં ઔદ્યોગિક ઉત્પાદન વાર્ષિક ધોરણે ૮% વધ્યું છે, જે જુલાઈમાં ૭.૪% હતું. એપ્રિલથી ઓગસ્ટ દરમિયાન ઔદ્યોગિક ઉત્પાદન વૃદ્ધિ પણ ૬.૭% પર પહોંચી ગઈ, જે ગયા વર્ષના સમાન સમયગાળામાં ૪.૨% હતી. મજબૂત આંકડા હોવા છતાં, નાણાકીય વર્ષ ૨૦૨૭ ના બીજા અર્ધવાર્ષિકમાં અર્થતંત્રને લગતા પડકારોનો સામનો કરવો પડી શકે છે. જેના કારણે અર્થતંત્રની ગતિ ધીમી પડી શકે છે.
મોતીલાલ ઓસ્વાલના અહેવાલ મુજબ, સમગ્ર નાણાકીય વર્ષ માટે વાસ્તવિક જીડીપી વૃદ્ધિ ૭%થી ૭.૨% રહેવાનો અંદાજ છે, પરંતુ પ્રથમ અર્ધવાર્ષિકની તુલનામાં બીજા અર્ધવાર્ષિકમાં ગતિ થોડી ધીમી પડી શકે છે. ક્રૂડ ઓઈલના ઊંચા ભાવથી લઈને નબળા ચોમાસા અને વધતા ફુગાવા સુધીના ઘણા જોખમો તેની પાછળ જવાબદાર છે.
બીજા છ મહિના માટે સૌથી મોટી ચિંતાઓમાં ક્રૂડ ઓઇલના ઊંચા ભાવનો સમાવેશ થાય છે. મોંઘું ક્રૂડ ઓઇલ કોર્પોરેટ ખર્ચમાં વધારો કરી શકે છે. આ ખાસ કરીને ઉચ્ચ ઉર્જા વપરાશ ધરાવતા ઉદ્યોગોને અસર કરી શકે છે. વધતા ખર્ચ કોર્પોરેટ નફા પર દબાણ લાવશે.
ચોમાસું બીજા છ મહિનાના વિકાસ માટે પણ મહત્વપૂર્ણ રહેશે. અલ નીનોને કારણે વરસાદ નબળો પડવાના જોખમ પર ભાર મૂકવામાં આવ્યો છે.
બીજા છ મહિનાનું ચિત્ર મોટે ભાગે ચોમાસા, ખાદ્ય ફુગાવા, ક્રૂડ તેલ અને અન્ય કોમોડિટીના ભાવ પર આધારિત રહેશે. વૃદ્ધિ મજબૂત રહી શકે છે, પરંતુ જો ફુગાવો વધે છે, તો વૃદ્ધિ અને ફુગાવા વચ્ચેનું સંતુલન પ્રથમ છ મહિના કરતાં ઓછું અનુકૂળ હોઈ શકે છે.