પૂરવઠા ખેંચ તથા ભાવ વધારાને પરિણામે એલપીજી ગ્રાહકોની સંખ્યામાં ઘટાડો

દાયકા કરતા વધુ સમય બાદ પહેલી વખત જોવા મળેલો ઘટાડો
મુંબઈ : પશ્ચિમ એશિયા યુદ્ધને પરિણામે દેશમાં એલપીજીનો પૂરવઠો ખોરવાઈ જવા ઉપરાંત તેના ભાવમાં નોંધપાત્ર ઉછાળો આવતા એપ્રિલથી ઓગસ્ટના ગાળામાં એલપીજી ગ્રાહકોની સંખ્યામાં ૬૨ લાખનો ઘટાડો થયો છે.
છેલ્લા એક દાયકા કરતા વધુ સમયમાં એલપીજી ગ્રાહકોમાં પહેલી જ વખત ઘટાડો જોવા મળ્યો છે. સપ્ટેમ્બરના પ્રારંભમાં એલપીજી ગ્રાહકોની સંખ્યા ૩૨.૭૭ કરોડ રહી હતી. જે એપ્રિલ પહેલા ૩૩.૩૯ કરોડ હતી.
યુદ્ધને કારણે પૂરવઠામાં ખલેલ પડવા ઉપરાંત તેલ કંપનીઓએ નવા જોડાણો આપવાનું બંધ કરવાની ફરજ પડી હતી એટલુ જ નહીં ભાવમાં પણ વધારો કરવાનું દબાણ આવ્યું હતું. યુદ્ધ પહેલા ભારતની એલપીજી આયાતમાં ૯૦ ટકા હિસ્સો અખાતી વિસ્તારનો રહ્યો હતો. ઈરાન યુદ્ધને કારણે આ વિસ્તારમાંથી એલપીજીના પૂરવઠા પર અસર પડી હોવાનું સરકારી સુત્રોએ જણાવ્યું હતું.
છેલ્લા અનેક વર્ષોથી એલપીજી ગ્રાહકોની સંખ્યામાં સતત ઉમેરો થતો જોવા મળ્યો છે, જેમાં હવે પીછેહઠ થઈ છે. નાણાં વર્ષ ૨૦૧૫-૧૬ના પ્રારંભમાં એલપીજી ગ્રાહકોની સંખ્યા ૧૪.૮૬ કરોડ હતી તે વર્તમાન નાણાં વર્ષના પ્રારંભમાં બમણાથી પણ વધુ રહીને ૩૩.૩૯ કરોડ જોવા મળી હતી.