અચાનક જ ઘટી ચાંદીની કિંમત, બે જ દિવસમાં રૂ. 6,600નો કડાકો! સોનું પણ થયું સસ્તું

Gold Silver rate fall 2026: સોના અને ચાંદીના ભાવમાં સતત બીજા દિવસે પણ મોટો ઘટાડો જોવા મળ્યો છે. મલ્ટી કમોડિટી એક્સચેન્જ (MCX) પર બજાર ખુલતાની સાથે જ બંને કિંમતી ધાતુઓના ભાવમાં મોટો કડાકો બોલાયો છે.

ચાંદીના ભાવમાં એકઝટકે ₹5200થી વધુનો ઘટાડો

સોમવારે ભારે કડાકો થયા બાદ મંગળવારે પણ માર્કેટ ખુલતાની સાથે જ ચાંદીના ભાવ તૂટી પડ્યા હતા. MCX પર 4 સપ્ટેમ્બરની એક્સપાયરીવાળી ચાંદીની કિંમત ખુલતાની સાથે જ ₹5296 સસ્તી થઈને ₹2,30,803 પ્રતિ કિલોગ્રામ પર આવી ગઈ હતી, જે અગાઉના કારોબારી દિવસે ₹2,36,099 પર બંધ થઈ હતી.

બે દિવસમાં ચાંદી ₹6600થી વધુ સસ્તી થઈ

આ સપ્તાહની શરૂઆતથી જ ચાંદીમાં સતત ઘટાડો થઈ રહ્યો છે. ગત શુક્રવારે ચાંદી ₹2,37,410 પર બંધ થઈ હતી, જે બે દિવસના ઘટાડા બાદ હવે ₹6607 પ્રતિ કિલોગ્રામ સસ્તી થઈ ગઈ છે. આ નવા ઘટાડા સાથે ચાંદી હવે તેના ઓલ ટાઈમ હાઈ લેવલ ₹4.20 લાખની સરખામણીએ લગભગ અડધી કિંમતે મળી રહી છે. વર્ષ 2026ની શરૂઆતમાં જાન્યુઆરી મહિનામાં ચાંદી ₹4 લાખની ઐતિહાસિક સપાટી વટાવી ગઈ હતી, પરંતુ ત્યારપછી તેમાં મોટો ઘટાડો આવ્યો છે.

સોનાના ભાવમાં પણ ₹1500થી વધુનો કડાકો

માત્ર ચાંદી જ નહીં, પણ સોનાના ભાવમાં પણ સતત ઘટાડો નોંધાઈ રહ્યો છે. MCX પર મંગળવારે 10 ગ્રામ 24 કેરેટ સોનાનો ભાવ ₹1566 ઘટીને ₹1,45,351 પર આવી ગયો હતો, જે સોમવારે ₹1,46,917 પર બંધ થયો હતો. સોનું પણ ગત શુક્રવારના ₹1,47,378ના રેટથી અત્યાર સુધીમાં ₹2027 જેટલું સસ્તું થઈ ચૂક્યું છે. જાન્યુઆરી મહિનામાં સોનાએ પણ પહેલીવાર પ્રતિ 10 ગ્રામ ₹2 લાખનો આંકડો પાર કર્યો હતો, જે હવે તેના હાઈ લેવલથી ઘણું સસ્તું મળી રહ્યું છે.