શેરબજારમાં F&O ટ્રેડિંગ માટે નવો નિયમ અમલી બન્યો

F&O શેર માટે CAS લાગુ કરવામાં આવ્યું, જે શેરની કિંમત નક્કી કરશે
અમદાવાદ : બજાર નિયમનકાર સેબીએ શેરની કિંમત નક્કી કરવાની રીતમાં મોટો ફેરફાર કર્યો છે. આ નિયમ હેઠળ, ૩ ઓગસ્ટથી ક્લોઝિંગ ઓક્શન સેશન (CAS) લાગુ કરવામાં આવ્યો છે. આ ફેરફારનો હેતુ શેરના ક્લોઝિંગ ભાવને વધુ પારદર્શક બનાવવા અને છેલ્લી ઘડીના ભાવમાં હેરાફેરી થવાની શક્યતા ઘટાડવાનો છે. શરૂઆતના તબક્કામાં, આ સિસ્ટમ ફક્ત F&O ટ્રેડિંગને આધીન શેરો પર લાગુ થશે.
ક્લોઝિંગ ઓક્શન સેશન એ ૧૫-મિનિટનું ખાસ સત્ર હશે, જે દરેક ટ્રેડિંગ દિવસે બપોરે ૩:૧૫ થી ૩:૩૦ વાગ્યા સુધી ચાલશે. આ સમય દરમિયાન, શેરની અંતિમ અથવા ક્લોઝિંગ કિંમત નક્કી કરવામાં આવશે.
અત્યાર સુધી, શેરનો બંધ ભાવ સામાન્ય રીતે બપોરે ૩:૦૦ થી ૩:૩૦ વાગ્યા વચ્ચેના ટ્રેડના મૂવિંગ એવરેજ પ્રાઇસના આધારે નક્કી કરવામાં આવતો હતો. જોકે, આ ભાવ હવે ક્લોઝિંગ ઓક્શન દ્વારા નક્કી કરવામાં આવશે.
ક્લોઝિંગ ઓક્શન સેશન દરમિયાન, ખરીદદારો અને વેચાણકર્તાઓ તેમના ઓર્ડર આપશે. જે ભાવ બધા ઓર્ડરને સંયુક્ત રીતે શ્રેષ્ઠ રીતે સંતુલિત કરે છે તેને તે સ્ટોકનો બંધ ભાવ ગણવામાં આવશે.
ટેકનિકલ રિસર્ચ વિશ્લેષકોના મતે, નવી સિસ્ટમ શેરોના બંધ ભાવને વધુ સંતુલિત અને વાજબી રીતે નક્કી કરવામાં મદદ કરશે. આ ફેરફાર વિશ્વભરના ઘણા મોટા સ્ટોક એક્સચેન્જો દ્વારા અપનાવવામાં આવેલા ધોરણો સાથે સુસંગત છે, તેથી રોકાણકારોએ તેની ચિંતા કરવાની જરૂર નથી.
જે શેરોમાં F&O ટ્રેડિંગ નથી, ત્યાં સામાન્ય ટ્રેડિંગ પહેલાની જેમ બપોરે ૩:૩૦ વાગ્યા સુધી ચાલુ રહેશે. જોકે, આવા શેર માટે પોસ્ટ-ક્લોઝિંગ સત્રનો સમય હવે બપોરે ૩:૫૦ થી ૪:૦૦ વાગ્યા સુધી બદલી દેવામાં આવ્યો છે.