US Dollar vs Indian Rupee : મધ્ય-પૂર્વમાં ચાલતા યુદ્ધના કારણે આજે પણ બોમ્બે સ્ટોક એક્સચેન્જ (BSE) અને નેશનલ સ્ટોક એક્સચેન્જમાં ધરખમ ઘટાડો થયો છે. આ ઉપરાંત ડૉલર સામે રૂપિયામાં પણ મોટો કડાકો નોંધાયો છે. સ્ટોક માર્કેટમાં ધરખમ ઘટાડો અને FII એટલે કે વિદેશી રોકાણકારો દ્વારા સતત વેચવાલીના કારણે ડૉલર સામે રૂપિયો પ્રથમવાર 95ને પાર પહોંચી ગયો છે. અમેરિકન ડૉલરના ઇન્ડિયન કરન્સી 95.14ના રૅકોર્ડ નીચલા સ્તરે પહોંચી ગયું છે.
આ વર્ષે ડૉલર સામે રૂપિયાનો 4.1 ટકા ઘટ્યો
રૅકોર્ડ કડાકા બાદ રૂપિયો એશિયાની સૌથી ખરાબ પ્રદર્શન કરનારું ચલણ બની ગયું છે. પહેલી જાન્યુઆરી-2026થી અત્યાર સુધીમાં ડૉલર સામે રૂપિયો 4.1 ટકા ગગડી ગયો છે. ભારતીય રિઝર્વ બૅન્કે સટ્ટેબાજી પ્રવૃત્તિઓ પર પ્રતિબંધ લાદ્યા હતા, જેના કારણે આજે ડૉલરના મુકાબલે રૂપિયે 130 પૈસા વધીને ખુલ્યો હતો. તાજેતરના સપ્તાહોમાં ભારતીય રૂપિયો સતત નીચલા સ્તરે પહોંચી રહ્યો હતો, ત્યારે આરબીઆઇએ રૂપિયાને સ્થિર કરવા માટે ડૉલર પર ઑનશોર લૉન્ગ પોઝીશન મર્યાદિત કરી દીધી હતી.
ભારતીય રૂપિયામાં મોટું ગાબડું, ડૉલર સામે રૂપિયો 96.71ના સ્તરે પહોંચ્યો
નેશનલ સ્ટોક એક્સચેન્જ (NSE) પર આજે અમેરિકી ડૉલર સામે ભારતીય રૂપિયાના મૂલ્યમાં ભારે ઘટાડો જોવા મળ્યો છે. USDINRની કિંમત 1.8175 પોઇન્ટ એટલે કે 1.92%ના જંગી ઉછાળા સાથે 96.7175 પર પહોંચી ગઈ છે. આજના ટ્રેડિંગ સત્રમાં માર્કેટ 96.48 પર ખુલ્યા બાદ સતત વોલેટિલિટી જોવા મળી હતી, જેમાં દિવસ દરમિયાન ઊંચામાં 96.71 અને નીચામાં 93.52ની સપાટી જોવા મળી હતી.
સેન્સેક્સમાં 1635 પોઇન્ટનો ધરખમ ઘટાડો
શેર માર્કેટની વાત કરીએ તો, BSE પર ગઈકાલે સેન્સેક્સ 73583.22 પોઇન્ટ પર બંધ થયા બાદ આજે 72565.22 પર ઓપન થયો હતો. જ્યારે નીચેમાં 71774.13 પોઇન્ટ પર અને ઊંચામાં 73165.32 પોઇન્ટ પર પહોંચ્યો હતો. છેવટે સેન્સેક્સ 1635.67 પોઇન્ટ(-2.22%)ના ધરખમ ઘટાડા સાથે 71947.55 પર પહોંચીને બંધ થયો છે. સેન્સેક્સના છેલ્લા 52 સપ્તાહના રૅકોર્ડની વાત કરીએ તો તે નીચામાં 71425.01 પોઇન્ટ અને ઊંચામાં 86159.02 પોઇન્ટ નોંધાયો છે.
આ પણ વાંચો : ડિજિટલ પેમેન્ટ, બૅન્ક નોમિની, લોન, ક્રેડિટ સ્કોર... જાણો 1 એપ્રિલથી કયા કયા નિયમ બદલાશે
