Business

છૂટક બાદ જથ્થાબંધ મોંઘવારીએ મૂકી માઝા! WPI ફુગાવો 12.29 ટકાએ પહોંચ્યો, ઈંધણ અને વીજળીની કિંમતોમાં ઊછાળો મોટું કારણ

By GS Team
16 Nov 20262 mins read
TukuTouch Logo
દેશમાં સામાન્ય જનતા પર મોંઘવારીનો માર વધ્યો છે. ઓક્ટોબર 2026માં જથ્થાબંધ મોંઘવારી 12.29% પર પહોંચી, જે 50 મહિનાનો ઉચ્ચતમ આંકડો છે. સપ્ટેમ્બરમાં તે 11.39% હતી. બળતણ, વીજળીના ભાવમાં ભડકો અને કાચા માલની મોંઘવારી મુખ્ય કારણ છે. છૂટક મોંઘવારી પણ 6.09% થતા RBIના નિયંત્રણ બહાર ગઈ છે. આનાથી EMI સસ્તા થવાની શક્યતા ઓછી થઈ છે.

Summarized by AI; it may make mistakes. Check important info

છૂટક બાદ જથ્થાબંધ મોંઘવારીએ મૂકી માઝા! WPI ફુગાવો 12.29 ટકાએ પહોંચ્યો, ઈંધણ અને વીજળીની કિંમતોમાં ઊછાળો મોટું કારણ

India WPI Inflation October 2026: દેશમાં સામાન્ય જનતા પર મોંઘવારીનો માર સતત વધી રહ્યો છે. ઓક્ટોબર 2026માં જથ્થાબંધ બજારની મોંઘવારી (Wholesale Price Index) વધીને 12.29 ટકા પર પહોંચી ગઈ છે, જે અગાઉ સપ્ટેમ્બર મહિનામાં 11.39 ટકા હતી. એટલે કે માત્ર એક જ મહિનામાં જથ્થાબંધ મોંઘવારીમાં 0.90 ટકાનો સીધો વધારો થયો છે. ઓક્ટોબર 2022 પછી પહેલીવાર જથ્થાબંધ મોંઘવારી 12 ટકાને પાર ગઈ છે, જે છેલ્લા 50 મહિનાનો (લગભગ 4 વર્ષથી વધુ સમયનો) સૌથી ઊંચો આંકડો છે.

બળતણ અને વીજળીના ભાવમાં ભડકો, ખાદ્ય ચીજોમાં નજીવી રાહત

મોંઘવારી વધવા પાછળનું સૌથી મોટું કારણ બળતણ (પેટ્રોલ, ડીઝલ, ગેસ) અને વીજળીના ભાવમાં થયેલો ભારે ઉછાળો છે. ઓક્ટોબરમાં બળતણ અને વીજળીની મોંઘવારી સપ્ટેમ્બરના 25.85 ટકાથી વધીને સીધી 32.84 ટકા થઈ ગઈ છે. આ ઉપરાંત કાચો માલ અને પ્રાથમિક ચીજવસ્તુઓ પણ મોંઘી થઈ છે, જેનો દર 8.67 ટકાથી વધીને 9.24 ટકા થયો છે. જોકે, થોડી રાહતની વાત એ છે કે ફેક્ટરીઓમાં બનતી તૈયાર વસ્તુઓની મોંઘવારી 9.76 ટકાથી ઘટીને 9.54 ટકા થઈ છે. સાથે જ ખાદ્ય ચીજોના જથ્થાબંધ ભાવમાં પણ નજીવો ઘટાડો નોંધાયો છે, જે 8.66 ટકાથી ઘટીને 8.58 ટકા પર આવ્યો છે.

છૂટક મોંઘવારી પણ રિઝર્વ બેંકના કાબૂ બહાર

માત્ર જથ્થાબંધ બજાર જ નહીં, પરંતુ સામાન્ય ગ્રાહકોને સીધી અસર કરતી છૂટક મોંઘવારી (Retail Inflation) પણ સતત 12મા મહિને વધીને ઓક્ટોબરમાં 6.09 ટકા પર પહોંચી ગઈ છે. ભારતીય રિઝર્વ બેંક (RBI)એ મોંઘવારીને 2થી 6 ટકાની વચ્ચે રાખવાનો નિયમ બનાવ્યો છે, પરંતુ છેલ્લા બે વર્ષમાં પહેલીવાર છૂટક મોંઘવારી 6 ટકાની આ મર્યાદાને વટાવી ગઈ છે.

સામાન્ય માણસના ખિસ્સા અને લોનના હપ્તા પર શું અસર થશે?

એક જ અઠવાડિયામાં છૂટક અને જથ્થાબંધ એમ બંને પ્રકારની મોંઘવારી વધવાના આંકડા સામે આવતા સામાન્ય લોકો અને અર્થતંત્ર પર બેવડો ફટકો પડ્યો છે. જથ્થાબંધ બજારમાં વસ્તુઓ મોંઘી થવાથી આગામી દિવસોમાં છૂટક બજારમાં પણ રોજબરોજની ચીજવસ્તુઓ વધુ મોંઘી થવાની શક્યતા છે. આ ઉપરાંત, મોંઘવારી બેકાબૂ બનતા હવે ડિસેમ્બર મહિનામાં રિઝર્વ બેંક (RBI) વ્યાજદરોમાં ઘટાડો કરે તેવી શક્યતા નહિવત્ થઈ ગઈ છે, જેના કારણે હોમ લોન કે કાર લોનના હપ્તા (EMI) સસ્તા થવાની રાહ જોઈ રહેલા લોકોને નિરાશા હાથ લાગી છે.