BSE, MCX અને બ્રોકિંગ કંપનીઓના શેરોમાં 12 ટકા સુધી કડાકો બોલાયો

મુંબઈ : નાણા પ્રધાન નિર્મલા સીતારામને આજે કેન્દ્રિય બજેટમાં શેર બજારોના એફ એન્ડ ઓના ટ્રેડરો પર સિક્યુરિટીઝ ટ્રાન્ઝેકશન ટેક્ષ (એસટીટી)નો અણધાર્યો બોજ વધારતાં અનેક શેરો ધડામ પછડાયા સાથે ખાસ બ્રોકિંગ બિઝનેસ સાથે સંકળાયેલી કંપનીઓ અને એક્સચેન્જોના શેરોમાં આજે ૧૨ ટકા સુધી કડાકો બોલાઈ ગયો હતો.

ભારતના સૌથી જૂના સ્ટોક એક્સચેન્જ બોમ્બે સ્ટોક એક્સચેન્જ (બીએસઈ) લિમિટેડના ટ્રેડિંગ વોલ્યુમમાં એસટીટી વધારાથી ઘટાડો થવાના અંદાજોએ નેગેટીવ પરિબળે શેરનો ભાવ આજે એક તબક્કે રૂ.૨૩૭૭.૪૦ સુધી તૂટી જઈ અંતે ૮.૧૨ ટકા એટલે કે રૂ.૨૨૭ ગબડીને રૂ.૨૫૭૦ બંધ રહ્યો હતો. મલ્ટિ કોમોટિડી એક્સચેન્જ ઓફ ઈન્ડિયા લિમિટેડ (એમસીએક્સ)ના શેરના ભાવ પણ આજે તૂટીને નીચામાં રૂ.૨૦૬૮.૫૦ સુધી ખાબકીને અંતે ૧૧.૯૫ ટકા એટલે કે રૂ.૩૦૨ તૂટીને રૂ.૨૨૨૬ બંધ રહ્યો હતો.

બ્રોકિંગ કંપનીઓના શેરોમાં પણ ટ્રેડિંગ વોલ્યુમમાં આગામી દિવસોમાં મોટા ઘટાડાની અને કંપનીઓની આવકમાં ઘટાડાના અંદાજોએ આજે ફંડોએ હેમરિંગ કર્યું હતું. એન્જલ વનનો શેર આજે એક તબક્કે નીચામાં રૂ.૨૧૯૯.૫૦ સુધી તૂટીને અંતે  રૂ.૨૩૨૧.૯૦ બંધ રહ્યો હતો. ગ્રો-બિલિયનબ્રેઈન્સનો શેર આજે તૂટીને નીચામાં રૂ.૧૫૨.૫૨ સુધી જઈ અંતે ૫.૧૧ ટકા એટલે કે રૂ.૯.૦૫ તૂટીને રૂ.૧૬૭.૯૯ બંધ રહ્યો હતો.

મોતીલાલ નો શેર નીચામાં રૂ.૭૧૬.૮૦ સુધી ગબડીને અંતે ૩.૯૨ ટકા એટલે કે રૂ.૨૯.૫૫ તૂટીને રૂ.૭૨૪ બંધ રહ્યો હતો. આનંદ રાઠી નો શેર તૂટીને નીચામાં રૂ.૫૩૦.૬૦ સુધી ખાબકી અંતે રૂ.૫૬૯ બંધ રહ્યો હતો.