વેલિંગ્ટનમાં વિરાટ કોહલીએ રિકી પોન્ટિંગનો સર્વકાલીન વર્લ્ડ રેકોર્ડ તોડી રચ્યો ઈતિહાસ, તેંડુલકર પણ પાછળ!

Kohli Surpasses Ponting In Historic Feat: ભારતીય ક્રિકેટ ટીમના પૂર્વ કેપ્ટન વિરાટ કોહલીએ શનિવારે પોતાની શાનદાર વનડે કારકિર્દીમાં વધુ એક સુવર્ણ સીમાચિહ્ન ઉમેર્યું છે. વેલિંગ્ટન ખાતે ભારત અને ન્યૂઝીલેન્ડ વચ્ચે રમાયેલી બીજી વનડે મેચ દરમિયાન કોહલી વનડે ક્રિકેટના ઇતિહાસમાં ન્યૂઝીલેન્ડ સામે સૌથી વધુ રન બનાવનાર વિશ્વનો નંબર-1 બેટ્સમેન બની ગયો છે. આ સિદ્ધિ હાંસલ કરવા સાથે તેણે ઓસ્ટ્રેલિયાના દિગ્ગજ કેપ્ટન રિકી પોન્ટિંગના વર્ષો જૂના વર્લ્ડ રેકોર્ડને તોડી નાખ્યો છે.

આ મેચમાં ઉતરતાં પહેલાં કોહલી અને પોન્ટિંગ બંને 1,971 રન સાથે બરાબરી પર હતા, કારણ કે કોહલીએ પ્રથમ વનડેમાં જ પોન્ટિંગના આ આંકડાની બરાબરી કરી લીધી હતી. પોન્ટિંગને પાછળ છોડવા માટે વિરાટને માત્ર 1 રનની જરૂર હતી અને તેણે ચોગ્ગો ફટકારીને ખાતું ખોલવાની સાથે જ આ ઐતિહાસિક મુકામ હાંસલ કરી લીધો હતો. જોકે, આ બીજી વનડેમાં તે 7 રન બનાવીને આઉટ થયો હતો.

ઉલ્લેખનીય છે કે 37 વર્ષીય કોહલીએ પ્રથમ વનડેમાં 74 રનની મહત્ત્વપૂર્ણ ઇનિંગ્સ રમીને વરસાદ પ્રભાવિત મેચમાં ભારતને DLS પદ્ધતિ હેઠળ 143 રનનો ટાર્ગેટ ચેઝ કરાવી સીરિઝમાં લીડ અપાવી હતી. હવે ન્યૂઝીલેન્ડ સામે કોહલીના નામે વનડેમાં કુલ 1,975 રન નોંધાઈ ચૂક્યા છે.

વનડે ક્રિકેટમાં ન્યૂઝીલેન્ડ સામે સૌથી વધુ રન બનાવનાર ટોચના બેટ્સમેનો

• વિરાટ કોહલી (ભારત): 1,975 રન
• રિકી પોન્ટિંગ (ઓસ્ટ્રેલિયા): 1,971 રન
• સચિન તેંડુલકર (ભારત): 1,750 રન
• કુમાર સંગાકારા (શ્રીલંકા): 1,568 રન
• સનથ જયસૂર્યા (શ્રીલંકા): 1,519 રન
• જેક્સ કાલિસ (સાઉથ આફ્રિકા): 1,449 રન

ભારતીય બોલરોનો તરખાટ: ન્યૂઝીલેન્ડ માત્ર 134 રનમાં ઓલઆઉટ

વિરાટ કોહલીએ આ ઐતિહાસિક સિદ્ધિ એવા દિવસે હાંસલ કરી જ્યારે ભારતના યુવા બોલિંગ આક્રમણે યજમાન ન્યૂઝીલેન્ડની ટીમને માત્ર 134 રનમાં જ ધ્વસ્ત કરી દીધી હતી. વરસાદના કારણે 47 ઓવરની કરાયેલી આ મેચમાં ભારતીય કેપ્ટન શુભમન ગિલે ટોસ જીતીને પહેલાં બોલિંગ કરવાનો નિર્ણય કર્યો હતો. ભારતીય બોલિંગ આક્રમણનું નેતૃત્વ કરતાં ગુરનૂર બ્રારે ઘાતક બોલિંગનું પ્રદર્શન કર્યું અને 4 વિકેટો ઝડપી હતી. બ્રારે ખાસ કરીને શોર્ટ-પીચ બોલિંગ દ્વારા ટોમ લેથમ અને ગ્લેન ફિલિપ્સને ડબલ-વિકેટ મેડન ઓવરમાં આઉટ કરીને કીવી બેટિંગ લાઇન-અપની કમર તોડી નાખી હતી. આકિબ નબી અને અંશુલ કંબોજે 2-2 વિકેટો મેળવી હતી, જ્યારે સ્પિનર અક્ષર પટેલે પણ 2 મહત્ત્વના બેટ્સમેનોને પેવેલિયન મોકલ્યા હતા. ન્યૂઝીલેન્ડ તરફથી ડેરીલ મિચેલે લડાયક બેટિંગ કરતાં સૌથી વધુ 55 રન બનાવ્યા હતા, જ્યારે કેપ્ટન મિચેલ સેન્ટનરે 31 રનનું યોગદાન આપ્યું હતું. ભારતીય બોલરોએ સમગ્ર ઇનિંગ્સ દરમિયાન સંયુક્ત રીતે કુલ 176 ડોટ બોલ ફેંકીને ન્યૂઝીલેન્ડના બેટ્સમેનો પર સતત દબાણ જાળવી રાખ્યું હતું.