બ્લૂમબર્ગ દ્વારા ભારતીય બોન્ડ્સનો પ્રવેશ ફરી મુલતવી

બોન્ડ બજારને મજબૂત બનાવવા અનેક પગલાં પણ રિઝલ્ટ શૂન્ય
બ્લૂમબર્ગના મતે ભારતીય બજારમાં તાજેતરના સુધારાઓની અસર દૈનિક વેપારમાં પ્રતિબિંબિત થવામાં વધુ સમય લાગશે : સરકારી બોન્ડ્સ યીલ્ડ પાંચ બેસિસ પોઇન્ટ વધશે
અમદાવાદ : બ્લૂમબર્ગ ઇન્ડેક્સ સર્વિસિસએ ફરીથી બ્લૂમબર્ગ ગ્લોબલ એગ્રીગેટ ઇન્ડેક્સમાં ફુલ એક્સેસ રૂટ (FAR) હેઠળ ભારતીય સરકારી સિક્યોરિટીઝનો સમાવેશ મુલતવી રાખ્યો છે. બ્લૂમબર્ગ એ જણાવ્યું હતું કે ભારતીય બજારમાં તાજેતરના સુધારાઓની અસર દૈનિક વેપારમાં પ્રતિબિંબિત થવામાં વધુ સમય લાગશે.
બ્લૂમબર્ગ ઇન્ડેક્સે જણાવ્યું હતું કે, પ્રાપ્ત માહિતી અનુસાર, ઘણા બજાર સહભાગીઓ અપેક્ષા રાખે છે કે બ્લૂમબર્ગ ગ્લોબલ એગ્રીગેટ ઇન્ડેક્સમાં સમાવેશ અંગે નિર્ણય લેવામાં આવે તે પહેલાં આ સુધારા દૈનિક વેપારમાં અસરકારક રીતે પ્રતિબિંબિત થશે.
બ્લૂમબર્ગ ઇન્ડેક્સ સર્વિસિસ તેના મુખ્ય ગ્લોબલ એગ્રીગેટ ઇન્ડેક્સમાં ભારતીય ફુલ એક્સેસ રૂટ હેઠળના બોન્ડ્સનો સમાવેશ કરવાની શક્યતાની સમીક્ષા કરી રહી છે. આ ઇન્ડેક્સ વૈશ્વિક રોકાણ-ગ્રેડ ફિક્સ્ડ ઇન્કમ માર્કેટ માટે એક મુખ્ય બેન્ચમાર્ક છે. આ વર્ષના જાન્યુઆરીમાં, તેણે શાસન અને બજાર માળખા અંગેની ચિંતાઓને કારણે નિર્ણય મુલતવી રાખ્યો હતો.
ભારતે આમાંની કેટલીક ચિંતાઓને દૂર કરવા માટે ઘણા પગલાં પણ લીધા છે. જૂન મહિનામાં, સરકારે સ્થાનિક બોન્ડ બજારને મજબૂત બનાવવા અને વિદેશી મૂડી આકર્ષવા માટે લાયક વિદેશી રોકાણકારો માટે ચોક્કસ સરકારી સિક્યોરિટીઝમાંથી વ્યાજ આવક અને મૂડી લાભ પર કરમુક્તિની જાહેરાત કરી હતી.
ભારતીય રિઝર્વ બેંક એ ફુલ એક્સેસ રૂટનો વ્યાપ પણ વિસ્તૃત કર્યો છે, જેમાં ૧૫ વર્ષ, ૩૦ વર્ષ અને ૪૦ વર્ષની પાકતી મુદત સાથે સરકારી સિક્યોરિટીઝના તમામ નવા ઇશ્યુને આવરી લેવામાં આવ્યા છે. રિઝર્વ બેંકે વિદેશી રોકાણકારો માટે રોકાણ નિયમો પણ હળવા કર્યા છે.
જાણકારો કહે છે કે સરકારી સિક્યોરિટીઝનો સમાવેશ કરવાના નિર્ણયને મુલતવી રાખવાથી સ્ટાન્ડર્ડ ૧૦-વર્ષના સરકારી બોન્ડ્સ પર યીલ્ડ ૪થી ૫ બેસિસ પોઇન્ટ વધી શકે છે. કારણ કે રોકાણકારોએ પહેલાથી જ સમાવેશમાં કિંમત નક્કી કરવાનું શરૂ કરી દીધું હતું.
બજાર આ વખતે બ્લૂમબર્ગ ગ્લોબલ એગ્રીગેટ ઇન્ડેક્સમાં આ સિક્યોરિટીઝનો સમાવેશ થવાની અપેક્ષા રાખતું હતું, પરંતુ એવું થયું નથી.