વધારાના 25 ટકા ટેરિફથી નિકાસલક્ષી ક્ષેત્રોમાં ફફડાટ: નાણાંકીય રાહતો જાહેર થશે

મુંબઈ : અમેરિકા દ્વારા ભારતના માલસામાન પર વધુ ૨૫ ટકા ટેરિફ લાગુ કરવાની કરાયેલી જાહેરાત સામે દેશમાં કાર્યરત વિવિધ નિકાસલક્ષી ક્ષેત્રો સાથે સંકળાયેલાઓએ ભારે ચિંતા વ્યકત કરવામાં આવી છે અને નિકાસકારોને  ટેકો પૂરો પાડવા રજૂઆત કરવામાં આવી છે. ગારમેન્ટસ, ઓટો કમ્પોનેન્ટ, જેમ્સ એન્ડ જ્વેલરી તથા ફૂટવેર જેવા દેશના ક્ષેત્રો અમેરિકામાં મોટી નિકાસ બજાર ધરાવે છે. 

ટેરિફ વધારીને બમણો કરાતા માઈક્રો અને મીડિયમ એપરલ ઉદ્યોગનો મૃત્યુ ઘંટ વાગી જશે. ખાસ કરીને અમેરિકાની બજાર પર નિર્ભર નિકાસકારોને મોટો ફટકો પડશે એમ જણાવી એપરલ એકસપોર્ટ પ્રમોશન કાઉન્સિલે ઉદ્યોગ માટે સરકાર તરફથી તાત્કાલિક નાણાંકીય પ્રોત્સાહનો પૂરા પડાય તેવી માગણી કરવામાં આવી છે. 

ટ્રમ્પની નવી જાહેરાતને પગલે શ્રમલક્ષી એવા એપરલ નિકાસ ઉદ્યોગને મોટો ફટકો પડશે એમ કાઉન્સિલના ચેરમેન સુધીર શેખરીએ જણાવ્યું હતું.

એપરલ ઉદ્યોગ આટલા જંગી ટેરિફને સહન કરી શકે એમ નથી. ટેરિફમાં આ અવ્યવહારુ વધારાથી માઈક્રો અને મીડિયમ એપરલ ઉદ્યોગ, ખાસ કરીને અમેરિકામાં નિકાસ ધરાવતા ઉપક્રમોનો મૃત્યુ ઘંટ વાગી જશે સિવાય કે સરકાર તેમની માટે રાજકોષિય ટેકો જાહેર કરે.

દેશમાંથી રેડીમેડ ગારમેન્ટસની નિકાસ માટે અમેરિકા મુખ્ય બજાર છે. ૨૦૨૪માં ગારમેન્ટની કુલ નિકાસમાંથી ૩૩ ટકા નિકાસ અમેરિકા ખાતે થઈ હતી. અમેરિકામાં ગારમેન્ટની નિકાસમાં ભારત ટોચનો મોટો દેશ છે. 

ટ્રમ્પના નિર્ણયથી ઓટો કમ્પોનેન્ટ ઉદ્યોગ સામે ટૂંકા ગાળે પડકારો ઊભા થશે ત્યારે આ ક્ષેત્રની સ્પર્ધાત્મકતા વધારવા અને નવી બજારો શોધવા પર  ઓટો કમ્પોનેન્ટ ઉદ્યોગના સુત્રોએ ભાર આપ્યો  હતો. ભારતના ઓટો કમ્પોનેન્ટસ ઉદ્યોગ માટે અમેરિકા મહત્વનું વેપાર ભાગીદાર છે.  નાણાં વર્ષ ૨૦૨૪-૨૫માં ભારતમાંથી ઓટો કમ્પોનેન્ટસની થયેલી ૨૨.૯૦ અબજ ડોલરની નિકાસમાંથી ૨૭ ટકા નિકાસ અમેરિકામાં થઈ હતી એમ ઓટોમોટિવ કમ્પોનેન્ટ મેન્યુફેકચરર્સ એસોસિએશન ઓફ ઈન્ડિયા દ્વારા જણાવાયું હતું. 

અમેરિકામાં ઊંચા ટેરિફને ધ્યાનમાં રાખી દેશનો જેમ એન્ડ જ્વેલરી ઉદ્યોગ નીચા ટેરિફ સાથેના દેશો જેમ કે દૂબઈ તથા મેક્સિકો ખાતે ઉત્પાદન એકમો ઊભા કરવા વિચારતા થયા છે. આવા દેશો ખાતે એકમો ઊભા કરી ત્યાંથી અમેરિકામાં નિકાસ કરવાનું સરળ પડશે એમ જેમ એન્ડ જ્વેલરી ઉદ્યોગના સુત્રો માની રહ્યા છે. આમ નહીં કરવામાં આવે તો નિકાસ વેપાર માટે કયામતના દિવસો આવી જશે તેવી પણ ઉદ્યોગ દ્વારા લાગણી વ્યકત કરવામાં આવી છે. 

ભારત દ્વારા નવી નિકાસ બજારો શોધવાની કવાયત

સેવા તથા માલસામાનની નિકાસ માટે ભારત નવી બજારો શોધી રહ્યું છે. ભારતના માલસામાન પર અમેરિકાના જંગી ટેરિફને ધ્યાનમાં રાખી નિકાસમાં વૈવિધ્યતા લાવવાના ભાગરૂપ નવી બજારો શોધવામાં આવી રહી હોવાનું વિદેશ મંત્રાલયના સુત્રોએ જણાવ્યું હતું. ભારત નવી તકો  ઉપરાંત નવી બજારો પણ શોધી રહ્યું હોવાનું સ્પષ્ટ કર્યું હતું.  દક્ષિણ એશિયા, આફ્રિકા, મધ્ય પૂર્વ તથા લેટિન અમેરિકાના દેશો ખાતે ભારત નવી બજારો શોધી રહ્યું છે. આ વિસ્તારોમાં માલસામાન વેચવાની શકયતા રહેલી છે. વિકલ્પો શોધવાનું કોઈપણ દેશો માટે સ્વાભાવિક છે.