લાખાજીનગરના શખ્સને પોક્સોના ગુનામાં ત્રણ વર્ષ સખત કેદની સજા

પોણા બે વર્ષ પૂર્વેની ઘટનામાં સ્પેશિયલ પોક્સો કોર્ટનો ચુકાદો

ભોગબનનારને ગુજરાત વિક્ટીમ કમ્પનસેશન સ્કીલ હેઠળ ૫૦ હજાર વળતર તરીકે ચૂકવવા આદેશ

ભાવનગર -  શહેરના લાખાજીનગરમાં રહેતા એક શખ્સને પોક્સોના ગુનામાં ત્રણ વર્ષ સખત કેદની સજા અને રોકડ રકમનો દંડ ફટકારવામાં આવ્યો છે.

શહેરના એરપોર્ટ રોડ, લાખાજીનગર, શેરી નં.૭માં રહેતો નરેશ મકાભાઈ ચૌહાણ નામના શખ્સે ગત તા.૧૧-૧૧-૨૦૨૪ના રોજ એક સગીરવયની દીકરીને પ્રેમસબંધ રાખવાનું કહીં તેણીની છેડતી-જાતિય સતામણી કરી હતી. જે બનાવ અંગે શખ્સ સામે ઘોઘારોડ પોલીસમાં બીએનએસની કલમ ૭૫ (ર), ૭૮ (ર), જાતિય ગુનાઓ સામે બાળકોને રક્ષણ આપતો અધિનિયમ-૨૦૧૨ની કલમ ૧૨ વગેરે હેઠળ ગુનો દાખલ થયો હતો. આ કેસ ભાવનગરના સ્પેશિયલ જજ પોક્સો અને બીજા એડી. ડિસ્ટ્રીક્ટ તથા સેશન્સ જજની કોર્ટમાં ચાલી જતાં રજૂ થયેલા આધાર-પુરાવાને ગ્રાહ્ય રાખી આરોપી નરેશ ચૌહાણને ત્રણ વર્ષ સખત કેદનો જેલવાસ તેમજ રોકડ રકમનો દંડ ફટકારવામાં આવ્યો છે. આ ઉપરાંત ન્યાયાધીશે ભોગબનનાર દીકરીને ગુજરાત વિક્ટીમ કમ્પનસેશન સ્કીમ-૨૦૧૯ અન્વયે ૫૦ હજાર રૃપિયા વળતર પેટે ચૂકવી આપવા હુકમ કર્યો હતો.