મહુવામાં 4.13 ઈંચ તો ગોંડલમાં 3.62 વરસાદ, 24 કલાકમાં 93 તાલુકામાં મેઘરાજાની ધડબડાટી, 3 જિલ્લામાં યલો એલર્ટ
Summarized by AI; it may make mistakes. Check important info
Summarized by AI; it may make mistakes. Check important info
Gujarat weather news Updates : ગુજરાતમાં છેલ્લા 24 કલાક દરમિયાન મેઘરાજાએ ફરી એકવાર ધમાકેદાર બેટિંગ કરી છે. રાજ્યના અનેક જિલ્લાઓમાં સાર્વત્રિક વરસાદ નોંધાયો છે, જેમાં વિશેષ કરીને સૌરાષ્ટ્ર પંથકમાં મેઘરાજા સૌથી વધુ મહેરબાન રહ્યા છે. હવામાન વિભાગના આંકડા મુજબ ગત તારીખ 20 સપ્ટેમ્બરના રોજ સવારે 6:00 વાગ્યાથી લઈને આજ તારીખ 21 સપ્ટેમ્બરના રોજ સવારે 6:00 વાગ્યા સુધીના સમયગાળા દરમિયાન રાજ્યના 93 તાલુકાઓમાં નોંધપાત્ર વરસાદ વરસ્યો છે.
સૌથી વધુ ભાવનગરના મહુવામાં ખાબક્યો વરસાદ
સૌરાષ્ટ્રના ભાવનગર જિલ્લાના મહુવા તાલુકામાં સૌથી વધુ 105 mm (4.13 inch) વરસાદ ખાબક્યો છે. આ ઉપરાંત રાજકોટના ગોંડલ તાલુકામાં 92 mm (3.62 inch) અને જૂનાગઢના માણાવદર તાલુકામાં 71 mm (2.80 inch) જેટલો ભારે વરસાદ નોંધાયો છે. જૂનાગઢ શહેરમાં 60 mm (2.36 inch) અને વંથલીમાં 52 mm (2.05 inch) વરસાદ વરસ્યો હોવાના અહેવાલ છે. આ ભારે વરસાદના કારણે અનેક વિસ્તારોમાં પાણી ભરાયા છે અને ખેતી પાકોને નવું જીવનદાન મળ્યું છે.
સૌરાષ્ટ્ર ઉપરાંત ગીર સોમનાથના પાટણ-વેરાવળમાં 50 mm (1.97 inch), દેવભૂમિ દ્વારકાના ભાણવડમાં 49 mm (1.93 inch), તેમજ અમરેલીના કુંકાવાવ વાડિયામાં 44 mm (1.73 inch) અને રાજકોટના જસદણમાં 40 mm (1.57 inch) વરસાદ નોંધાયો છે. સુરત શહેરમાં પણ 39 mm (1.54 inch) વરસાદ વરસ્યો છે. આમ, રાજ્યના અનેક તાલુકાઓમાં સામાન્યથી લઈને ભારે વરસાદ પડવાને કારણે લાંબા સમયથી ચાલી રહેલા ઉકળાટમાંથી લોકોને રાહત મળી છે અને ખેડૂતોમાં ભારે ખુશીની લહેર છવાઈ ગઈ છે.
નાઉકાસ્ટ : 3 જિલ્લામાં યલો એલર્ટ
આજે સવારના સાતથી દસ વાગ્યા એટલે કે ત્રણ કલાક માટે નવસારી, વલસાડ અને ડાંગ તથા બે કેન્દ્રશાસિત પ્રદેશ દીવ-દમણ અને દાદરા નગર હવેલીમાં વરસાદનું યલો એલર્ટ જાહેર કરવામાં આવ્યું છે.
