વડોદરા: દારૂના નશામાં એસટી બસ હંકારી, ડ્રાઈવરની અટકાયત

Vadodara: વડોદરા શહેરના આજવા ચોકડીથી સિકંદરપુરા તરફ જતા માર્ગ પર અમેરિકન સ્કૂલ સામે જીએસઆરટીસી બસનો ચાલક દારૂના નશાની હાલતમાં હોવાનું જણાતા 112 પોલીસની ટીમે બસને અટકાવી હતી. તપાસ દરમિયાન જંબુસર-વડોદરા રૂટની એસટી બસના ચાલકે દારૂ પીધેલો હોવાનું સામે આવતા સમગ્ર મામલો કપુરાઈ પોલીસ મથકે પહોંચ્યો હતો.

આ મામલે કપુરાઈ પોલીસે પાણીગેટ બસ ડેપોમાં ચાલક તરીકે ફરજ બજાવતા લાલા લક્ષ્મણ બારીયા (રહે. પરમપુર ગામ, લુણાવાડા, મહીસાગર) સામે પ્રોહિબિશન હેઠળ ગુનો નોંધી તેની અટકાયત કરી છે.

પોલીસે નશાની હાલતમાં બસ ચલાવતા ચાલક પાસેથી બસનો કબજો લઈ તેને સેન્ટ્રલ બસ ડેપોના ઇન્ચાર્જને પરત સોંપી હતી. એસટી બસનો ચાલક નશાની હાલતમાં ઝડપાતા મુસાફરોની સુરક્ષા અને એસટી તંત્રની દેખરેખ સામે સવાલો ઊભા થયા છે.