ટુ વ્હીલરમાં દારૃની ૬૫૫ બોટલ સંતાડીને આવતા બે કેરિયર ઝડપાયા

ટુ વ્હીલરમાં સંતાડેલી દારૃની ૬૫૫ નાની બોટલ સાથે બે કેરિયરને બાપોદ પોલીસે પીછો કરીને ઝડપી પાડયા છે. જ્યારે પીસીબી પોલીસે ગાજરાવાડીમાંથી દારૃની ૨૪૪ બોટલ કબજે કરી છે.
બાપોદ પોલીસે વોચ ગોઠવીને ટુ વ્હીલર પર દારૃ લઇને આવતા અલ્કેશ અરવિંદભાઇ રાઠવા (રહે.ડામર ફળિયું ગામ, છોટાઉદેપુર) તથા સુનીલ પ્રતાપભાઇ રાઠવા (રહે. નિશાળ ફળિયું, ગામ લગામી,છોટાઉદેપુર) ને ઝડપી પાડયા હતા. પોલીસે તેઓ પાસેથી દારૃની કુલ ૬૫૫ બોટલ કિંમત રૃપિયા ૯૧,૧૦૦ ની કબજે કરી હતી. દારૃ સપ્લાય કરનાર છોટાઉદેપુરના રિતેશ રાઠવા તથા દારૃ મગાવનાર વડોદરા તાલુકાના દોડકા ગામના લક્ષ્મીબેન અર્જુનભાઇ માળીને પોલીસે વોન્ટેડ જાહેર કર્યા છે.
જ્યારે અન્ય એક કેસમાં પીસીબી પોલીસે ગઈકાલે ગાજરાવાડી રંગમહાલ સ્થિત શારદા એવન્યુના મકાન નંબર ૩૦૨માં દરોડો પાડતા ૨૫ વર્ષીય મિહિર ઉર્ફે હની નરેન્દ્રસિંહ ઠાકોર રંગેહાથ ઝડપાઈ ગયો હતો. તપાસ દરમિયાન તેના આ ઘર તેમજ વાડી સાંઈધામ ફ્લેટના મકાનમાંથી વિદેશી દારૃની કુલ ૨૪૪ બોટલ કિંમત રૃ. ૬૪,૨૪૦ ની મળી આવી હતી. દારૃનો જથ્થો સપ્લાય કરનાર કમો રાઠવા અને ખુલસીંગ રાઠવાની શોધખોળ શરૃ કરવામાં આવી છે.