ગણેશોત્સવ દરમિયાન દાદાના ઘરે રહેવા આવેલા પૌત્રની લાશ ઝાડ પર લટકતી મળી

દાદાના ઘરે રહેવા આવેલા ૧૯ વર્ષના પૌત્રે ઝાડની ડાળી પર ફાંસા ખાઇને આપઘાત કરી લીધો હતો.જ્યારે અન્ય કેસમાં યુ.પી.થી વડોદરા કામ ધંધા માટે આવેલા યુવકે કંટાળીને જીવન ટૂંકાવી દીધું છે.
પોલીસ સૂત્રો દ્વારા મળતી માહિતી મુજબ, તરસાલી બાયપાસ નવીનગરીમાં રહેતા દાદા દાદીના ઘરે ગણેશોત્સવમાં રહેવા માટે રોહિત હરમાનભાઇ રાઠોડિયા (રહે. ડભોઇ) અને તેનો ભાઇ આવ્યા હતા. તેઓના માતા પિતાનું ૧૦ વર્ષ અગાઉ અવસાન થયું હતું. નેશનલ હાઇવે તરસાલીથી જાંબુવા બ્રિજ તરફ જતા રોડ પર હોટલ ગિરનારની પાછળ આવેલા એક ગાર્ડનમાં તેના દાદા સિક્યુરિટી જવાન તરીકે કામ કરતા હતા. બગીચાની બાજુમાં આવેલી ખુલ્લી જગ્યામાં ઝાડની ડાળી પર રોહિતે ફાંસો ખાઇ લીધો હતો. કપુરાઇ પોલીસ સ્ટેશનના એ.એસ.આઇ. રવિન્દ્રસિંહે આ અંગે કાયદેસરની કાર્યવાહી હાથ ધરી છે. જ્યારે અન્ય એક કિસ્સાની વિગત એવી છે કે, પરિવાર સાથે કામ ધંધા બાબતે ઝઘડો થતા યુ.પી.થી ઘર છોડીને આવેલા વિજયપાલ સૈનીએ વડોદરા નજીક દુમાડ ગામે નવી બંધાતી આઇ.આઇ.આઇ.ટી. કોલજેની મેસમાં ગળા ફાંસો ખાઇને આપઘાત કરી લીધો હતો.