વિસર્જન યાત્રા દરમિયાન વીડિયો ઉતારતા યુવક પર હુમલો

વિસર્જન યાત્રા દરમિયાન ટુ વ્હીલર સ્લિપ થઇ જતા ત્રણ થી ચાર આરોપીઓએ હુમલો કરી ઇજા પહોંચાડી હતી. જે અંગે કુંભારવાડા પોલીસે ગુનો દાખલ કરી કાર્યવાહી હાથ ધરી છે.
વારસિયાની એસ.કે. કોલોનીમાં રહેતા વેપારી મુરલીધર કિશનચંદ મંગવાણીએ કુંભારવાડા પોલીસ સ્ટેશનમાં ફરિયાદ નોંધાવી જણાવ્યું છે કે, ગઇકાલે ગણપતિનો તહેવાર હોઇ રાત્રે સાડા અગિયાર વાગ્યે અમારા મહોલ્લાના ગણપતિજીની મૂર્તિનું વિસર્જન કરવાનું હોઇ મારો દીકરો મોહન તથા ઓમ મહેન્દ્રકુમાર વલેચા, મનીષ ઘનશ્યામભાઇ કેશવાણી તથા મહોલ્લાના અન્ય લોકો કારમાં મૂર્તિ મૂકી વારસિયા તળાવમાં વિસર્જન કરવા માટે નીકળ્યા હતા.ઓમ વલેચા વીડિયો ઉતારતો હતો. તે દરમિયાન જૂના આર.ટી.ઓ. તરફથી મોપેડ પર ત્રણ સવારી આવતા યુવકોનું મોપેડ ઓમની આગળ આવી સ્લિપ થઇ ગયું હતું. મોપેડ પરથી અજાણ્યા લોકોએ આવી ઓમ સાથે ઝઘડો કરી તેને લાફો મારી દીધો હતો. હુંઅને મારો પુત્ર છોડાવવા પડતા તેઓએ અમને પણ માર માર્યો હતો. મને તથા મારા પુત્રને હાથમાં પહેરવાના કડાથી ઇજા થઇ હતી.દરમિયાન અન્ય લોકો આવી જતા તમને જોઇ લઇશું તેવી ધમકી આપી આરોપીઓ જતા રહ્યા હતા.