૧૫ વર્ષની સગીરા પર દુષ્કર્મ મામલે આરોપીની અટકાયત

શહેરના વાઘોડિયા રોડ વિસ્તારમાં રહેતી ૧૫ વર્ષની સગીરા પર દુષ્કર્મ આચરવાના આરોપસર કપૂરાઈ પોલીસે ૨૪ વર્ષના યુવક સામે બળાત્કાર અને પોક્સો સહિતની કલમો હેઠળ ગુનો નોંધી તેની અટકાયત કરી છે.

ફરિયાદ મુજબ, ધોરણ-૧૦માં અભ્યાસ કરતી સગીરાનો સોસાયટીમાં જ રહેતા આરોપી પ્રફુલ બારિયા સાથે સોશ્યલ મીડિયા મારફતે પરિચય થયો હતો. બાદમાં આરોપીએ સગીરા તેમજ તેના પરિવારને માર મારી નાખવાની ધમકી આપી સગીરા સાથે સોસાયટીના પાર્કિંગમાં તેમજ વાંસ તળાવ નજીક ઇકો કારમાં ત્રણ વખત દુષ્કર્મ આચર્યું હોવાનો આક્ષેપ છે.

આ મામલે સગીરાના પિતાએ કપૂરાઈ પોલીસ સ્ટેશને ફરિયાદ નોંધાવતા પોલીસે આરોપી સામે બળાત્કાર અને પોક્સો અધિનિયમ સહિતની જોગવાઈઓ હેઠળ ગુનો દાખલ કર્યો છે. આરોપી છૂટક ડ્રાઇવિંગનું કામ કરે છે.

પોલીસે આરોપીની અટકાયત કરીને આરોપી અને ભોગ બનનાર બંનેનું મેડિકલ પરીક્ષણ કરાવ્યું છે. એફએસએલ તપાસ માટ ઘટનામાં વપરાયેલી ઇકો કાર કબજે લીધી  છે. ઉપરાંત, ઘટનાસ્થળના સીસીટીવી ફૂટેજ કબજે કરવાની કાર્યવાહી હાથ ધરાઈ છે.