તાંદળજાના આશિયાના નગર પાસે માર્ગ પર વિશાળ ભૂવો પડ્યો, એક તરફનો માર્ગ બંધ કરાયો

Vadodara Corporation : વડોદરા શહેરના તાંદળજા વિસ્તારમાં આશિયાના સોસાયટી પાસે માર્ગ પર વિશાળ ભૂવો પડ્યો છે.
ભૂવામાંથી ડ્રેનેજનું પાણી સતત વહેતું જોવા મળતાં માર્ગ વધુ ધસી જવાની આશંકા વ્યક્ત કરવામાં આવી રહી છે. અકસ્માત ટાળવા માટે સ્થાનિકોએ સુરક્ષાના ભાગરૂપે રસ્તાની એક તરફનો વાહન વ્યવહાર બંધ કરી દીધો હતો. જેના કારણે વિસ્તારમાં ટ્રાફિક જામના દૃશ્યો સર્જાયા હતા અને વાહનચાલકોને ભારે હાલાકીનો સામનો કરવો પડ્યો હતો.
સ્થાનિકોનું કહેવું છે કે ભૂવો પડ્યા બાદ માર્ગ પરથી પસાર થવું જોખમી બની ગયું છે. જો તાત્કાલિક સમારકામ નહીં કરવામાં આવે તો વધુ મોટો અકસ્માત સર્જાઈ શકે છે. સ્થાનિકોએ તંત્રને તાત્કાલિક સ્થળનું નિરીક્ષણ કરીને ભૂવાનું સમારકામ કરવા માગ કરી છે.