64 વર્ષ બાદ આવું દુર્લભ સૂર્યગ્રહણ! દિવસમાં છવાશે અંધારું, જાણો ભારતમાં સૂતક પાળવો કે નહીં
Summarized by AI; it may make mistakes. Check important info
Summarized by AI; it may make mistakes. Check important info
Surya Grahan 2026: વર્ષ 2026નું બીજું અને અંતિમ સૂર્યગ્રહણ લાગવા જઈ રહ્યું છે. આ સૂર્યગ્રહણ ઘણી રીતે ખાસ રહેશે. કારણ કે લગભગ ત્રણ દાયકામાં પહેલી વાર પૃથ્વી પર આવું સૂર્યગ્રહણ જોવા મળશે અને જો તમે તેને જોવામાં ચૂકી જાઓ છો, તો તમારે આગામી આવા સૂર્યગ્રહણ માટે 64 વર્ષ રાહ જોવી પડી શકે છે. વૈજ્ઞાનિકોનું કહેવું છે કે ઘણા વિસ્તારોમાં ગ્રહણ દરમિયાન એવું લાગશે કે જાણે દિવસ રાતમાં ફેરવાઈ ગયો હોય.
12 ઓગસ્ટ એટલે કે આવતીકાલે થનારું આ સૂર્યગ્રહણ ખગોળશાસ્ત્રની દ્રષ્ટિએ ખૂબ જ ખાસ છે. જેમ-જેમ ચંદ્ર સૂર્યની સામે આવતો જશે, તેમ-તેમ સૂર્યનો મોટો હિસ્સો તેના પડછાયામાં છુપાઈ જશે. જ્યારે ગ્રહણ તેની ચરમ પર પહોંચશે ત્યારે આકાશમાં પ્રકાશ ખૂબ ઓછો થઈ જશે. ચંદ્ર સૂર્યના લગભગ 90 ટકા ભાગને ઢાંકી દેશે. જેમ-જેમ ચંદ્ર સૂર્યને ઢાંકતો રહેશે, તેમ-તેમ પ્રકાશ ઓછો થતો જશે અને એક સમયે એવું લાગશે કે જાણે રાત પડી ગઈ હોય.
આ દરમિયાન તમે તાપમાનમાં થોડો ઘટાડો અનુભવી શકો છો અને આસપાસનું વાતાવરણ બદલાયેલું દેખાઈ શકે છે. જોકે, આ ફક્ત થોડા સમય માટે જ રહેશે. ગ્રહણ સમાપ્ત થયા પછી સૂર્યપ્રકાશ પાછો આવશે અને વાતાવરણ ધીમે-ધીમે સામાન્ય થઈ જશે.
ક્યાં-ક્યાં દેખાશે આ સૂર્યગ્રહણ?
આ સૂર્યગ્રહણનો શાનદાર નજારો યુરોપના કેટલાક ભાગો અને ઉત્તર એટલાન્ટિક ક્ષેત્રમાં જોવા મળશે. બ્રિટન, સ્પેન, આઈસલેન્ડ અને ગ્રીનલેન્ડ એવા મુખ્ય સ્થળોમાં સામેલ છે જ્યાં આ ગ્રહણ દેખાશે.
પ્રાપ્ત માહિતી પ્રમાણે ધરતી પર 1999 બાદ 12 ઓગસ્ટ, 2026ના રોજ એટલે કે આવતીકાલે પૃથ્વી પર આવું દુર્લભ સૂર્યગ્રહણ જોવા મળશે. બીજી તરફ આવું સૂર્યગ્રહણ 23 ઓગસ્ટ, 2090ના રોજ થવાની ધારણા છે. આવી સ્થિતિમાં જે લોકો આ દુર્લભ ખગોળીય ઘટનાના સાક્ષી બનશે, તેમના માટે આ ખૂબ જ ખાસ અનુભવ હશે.
શું આ સૂર્યગ્રહણ ભારતમાં દેખાશે?
હવે સવાલ એ છે કે શું આ સૂર્યગ્રહણ ભારતમાં દેખાશે? જવાબ છે-ના. ભારતના લોકો આ અદ્ભુત દૃશ્ય જોઈ શકશે નહીં. કારણ કે સૂર્યગ્રહણ ભારતીય સમય અનુસાર રાત્રે થશે. તેથી, ભારતમાંથી સૂર્ય દેખાશે નહીં અને ગ્રહણ પણ નહીં દેખાશે.
ભારતીય સમય પ્રમાણે ગ્રહણની શરૂઆત રાત્રે 9:04 વાગ્યે થશે. પૂર્ણ ગ્રહણની શરૂઆત રાત્રે 10:29 વાગ્યે થશે. ગ્રહણ રાત્રે 11:16 વાગ્યે તેના મધ્ય તબક્કામાં પહોંચશે. 13 ઓગસ્ટના રોજ લગભગ 1:27 વાગ્યે ગ્રહણ સમાપ્ત થશે. આ સમય દરમિયાન ભારતમાં રાત્રિ હશે અને તેથી અહીં સૂર્યગ્રહણ દેખાશે નહીં.
ભારતમાં સૂતક કાળ લાગશે કે નહીં?
હવે ભારતમાં સૂર્યગ્રહણ દેખાશે નહીં તેથી સૂતક કાળ વિશે પણ સવાલો ઉભા થાય છે. ધાર્મિક માન્યતાઓ પ્રમાણે સૂતક કાળ ગ્રહણની દૃશ્યતા સાથે જોડાયેલો છે. આવી સ્થિતિમાં જ્યારે 12 ઓગસ્ટનું સૂર્યગ્રહણ ભારતમાં દેખાશે નહીં, તેથી સૂતક કાળ અને તેની સાથે સંકળાયેલા નિયમો અહીં લાગુ પડશે નહીં.
