ભાડે રાખેલો વૈભવી બંગલો અને ટ્રોલી બેગની 'ટ્રિક', અમદાવાદમાં વિદેશી દારૂના નેટવર્કનો ભાંડફોડ

Ahmedabad News: આગામી ઐતિહાસિક રથયાત્રા પૂર્વે અમદાવાદ પોલીસ હરકતમાં આવી છે. બોડકદેવ પોલીસ સ્ટેશનની ટીમે પેટ્રોલિંગ દરમિયાન મળેલી ચોક્કસ બાતમીના આધારે સાયન્સ સિટી રોડ પર આવેલા 'ગુલમોહર ગ્રીન બંગલો' માં દરોડો પાડીને વિદેશી દારૂનો મોટો જથ્થો ઝડપી પાડયો છે. પોલીસે સ્થળ પરથી 200 નંગ ઇંગ્લિશ દારૂની બોટલ, 48 નંગ બિયર ટીન અને મોબાઈલ ફોન સહિત કુલ 3,88,710નો મુદ્દામાલ જપ્ત કર્યો છે. સમગ્ર મામલે પોલીસે બે આરોપીની ધરપકડ કરીને આગળની કાર્યવાહી હાથ ધરી છે.

અમદાવાદમાં વિદેશી દારૂના નેટવર્કનો ભાંડફોડ

ગુજરાતમાં ખાલી નામની જ દારૂબંધી હોવાની ઘટનાઓ સામે આવતી હોય છે, ત્યારે અમદાવાદના સાયન્સ સિટી રોડ પરના બંગલોમાંથી પોલીસે દારૂ સહિતનો રૂ.3.88 લાખનો મુદ્દામાલ ઝડપી પાડ્યો છે. આ મામલે પોલીસે કીરણ ભાટીયા અને કવિષ ભાટીયા નામના બે આરોપીઓની ધરપકડ કરી છે.

પોલીસ તપાસમાં જાણવા મળ્યું કે, આરોપીઓ પોલીસ અને સોસાયટીના લોકોને ચકમો આપવા માટે ભાડે રાખેલા વૈભવી બંગલામાં રહેતા હતા. આમ, કોઈને શંકા ન જાય તે માટે તેઓ કપડાં ભરવાની મોટી ટ્રોલી બેગ લઈને ટ્રેનથી હરિયાણા જતા હતા. આ પછી આરોપી ત્યાંથી દારૂ છુપાવીને અમદાવાદ લાવ્યા બાદ વેચાણ કરતા હતા. સમગ્ર મામલે બોડકદેવ પોલીસે ગુનો નોંધી આગળની કાયદેસરની કાર્યવાહી હાથ ધરી છે.