PPF કે SIP? 15 વર્ષ સુધી રોકાણ બાદ શેમાં મળશે વધુ રિટર્ન? સમજો ગણિત

PPF-SIP Mutual Fund Calculation: જો તમે દર વર્ષે મોટી રકમ બચાવો છો, પરંતુ સરકારી યોજનાઓમાં રોકાણ કરવું કે શેરબજારમાં પૈસા લગાવવા તે અંગે મૂંઝવણમાં છો, તો અહીં કેલ્ક્યુલેશન દ્વારા સમજો કે ક્યાં વધુ ફાયદો મળશે અને ક્યાં રોકાણ કરવું સુરક્ષિત રહેશે.

અહીં PPF અને SIPને લઈને કેલ્ક્યુલેશન આપવામાં આવ્યું છે. આ બંને 15 વર્ષ માટે ઉત્તમ વિકલ્પ માનવામાં આવે છે. જોકે, PPFમાં સરકારી ગેરંટી મળે છે, જ્યારે SIPમાં જોખમની સાથે શેરબજારની ગ્રોથનો લાભ મળે છે. આ જ કારણોસર 15 વર્ષ પછી બંનેમાં થનારી કમાણી અલગ-અલગ હોઈ શકે છે.

PPFની વાત કરીએ તો તે એક સરકારી બચત યોજના છે. તેમાં વ્યાજદર નિશ્ચિત હોય છે અને હાલમાં તે 7.1 ટકા છે. આ યોજનામાં પૈસા સંપૂર્ણપણે સુરક્ષિત રહે છે અને મેચ્યોરિટી પર મળતી રકમ પણ ટેક્સ ફ્રી રહે છે. બીજી તરફ SIPની વાત કરીએ તો તે મ્યુચ્યુઅલ ફંડમાં પૈસા રોકવામાં આવે છે, જેમાં ફિક્સ્ડ રિટર્ન મળતું નથી. જો બજારમાં તેજી રહે તો કમાણી વધુ થઈ શકે છે. આ સાથે જ જો માર્કેટમાં ઘટાડો આવે તો રિટર્ન પણ ઘટી શકે છે.

15 વર્ષમાં PPF કેટલું રિટર્ન આપશે?

જો તમે PPFમાં દર વર્ષે 1.5 લાખનું રોકાણ કરો છો, તો તમને વાર્ષિક 7.1 ટકા લેખે વ્યાજ મળશે. મેચ્યોરિટી પર તમને 40,68,209 મળશે, જેમાં 18,18,209 વ્યાજ હશે અને કુલ રોકાણ કરેલી રકમ 22,50,000 થશે.

SIPમાં રોકાણ પર કેટલો નફો

જો તમે SIP દ્વારા વાર્ષિક 1.5 લાખ અથવા દર મહિને 12,500નું રોકાણ કરો છો અને તેના પર અંદાજિત 12 ટકા રિટર્ન મળે છે, તો 15 વર્ષ પછી કુલ રકમ 59,49,142 થશે. જેમાં વ્યાજ દ્વારા થયેલી કમાણી 36,99,142 હશે.

ટેક્સને લઈને શેમાં ફાયદો?

આ હિસાબે જોઈએ તો તમને SIP દ્વારા 20 લાખથી વધુનો નફો મળે છે, પરંતુ મ્યુચ્યુઅલ ફંડમાં તમારે ટેક્સ ચૂકવવો પડી શકે છે. જે તમે કયા પ્રકારનું મ્યુચ્યુઅલ ફંડ પસંદ કર્યું છે તેના પર નિર્ભર કરે છે. જ્યારે PPFમાં ટેક્સ ફ્રી રિટર્ન મળે છે.