ભાડે ઘર રાખતાં પહેલાં આટલું જાણી લેજો! એગ્રીમેન્ટમાં આ 5 બાબતો નહીં તપાસી હોય તો મકાનમાલિક સાથે કકળાટ થશે

Rent Agreement: આજે શહેરોમાં નોકરી અને અભ્યાસ માટે આવતા ઘણા લોકો ભાડાના મકાનમાં રહે છે. ત્યારે ભાડાનું મકાન લેતા પહેલા રેન્ટ એગ્રીમેન્ટ બનાવડાવવું એ સૌથી મહત્વપૂર્ણ પગલું હોય છે. ઘણી વખત આપણે ઉતાવળમાં વાંચ્યા વગર જ દસ્તાવેજો પર સહી કરી દઈએ છીએ, જેનાથી પછીથી મકાનમાલિક અને ભાડૂઆત વચ્ચે કકળાટ અને વિવાદની સ્થિતિ ઊભી થાય છે. જો તમે પણ રેન્ટ એગ્રીમેન્ટ સાઈન કરવા જઈ રહ્યા છો, તો ભવિષ્યની કોઈ પણ મુશ્કેલીથી બચવા માટે આ જરૂરી વાતોનું ધ્યાન રાખવું ખૂબ જ જરૂરી છે.

રેન્ટ એગ્રીમેન્ટ વાંચ્યા વગર ન કરો કોઈ ડીલ

દસ્તાવેજમાં સૌથી પહેલાં એ ચેક કરો કે તમારા અને મકાનમાલિક વચ્ચે ભાડાની કેટલી રકમ નક્કી થઈ છે. એ પણ જુઓ કે તમે ભાડું કઈ રીતે આપશો. સૌથી મહત્વની વાત કે એગ્રીમેન્ટમાં એ સ્પષ્ટ હોવું જોઈએ કે દર વર્ષે ભાડામાં કેટલા ટકાનો વધારો થશે. જો આ હિસ્સો ખાલી છે, તો તમે ભાડાને લઈને મોલભાવ કરી શકો છો. આ સાથે જ યાદ રાખો કે 11 મહિનાથી ઉપરના એગ્રીમેન્ટનું કાનૂની રીતે રજિસ્ટર્ડ હોવું ફરજિયાત છે.

ભાડું ચૂકવવામાં મોડું થાય તો શું પેનલ્ટી આપવી પડશે?

જીવનમાં ઘણી વખત ખર્ચાઓ અચાનક વધી જાય છે અને ભાડું ચૂકવવામાં થોડા દિવસોનો વિલંબ થઈ શકે છે. એવામાં શું મકાનમાલિક તમારા પર કોઈ લેટ ફી કે પેનલ્ટી લગાવશે? આ વાત એગ્રીમેન્ટમાં સ્પષ્ટપણે લખેલી હોવી જોઈએ. આ ઉપરાંત, ઘર ખાલી કરતી વખતે તમારું સિક્યોરિટી ડિપોઝિટ કઈ શરતો પર અને કેટલા દિવસોમાં પાછું મળશે, તે પણ લેખિતમાં હોવું જોઈએ જેથી બાદમાં તમારા પૈસા અટવાય નહીં.

જૂના બિલની ક્લિયરન્સ અને સુવિધાઓનો ખર્ચ

નવા ઘરની ચાવી લેતા પહેલાં એ પાકું કરી લો કે જૂના ભાડૂઆતના વીજળી, પાણી, હાઉસ ટેક્સ અને સોસાયટી મેન્ટેનન્સના તમામ બિલ ચૂકવાઈ ગયા છે કે નહીં. નહીંતર જૂનું બાકી તમારા માથે આવી શકે છે. આ સાથે જ જો તમે સોસાયટીના જીમ, ક્લબ હાઉસ, સ્વિમિંગ પૂલ કે પાર્કિંગનો ઉપયોગ કરવાના છો, તો તેના ચાર્જિસ શું હશે? આ બધી બાબતો એગ્રીમેન્ટનો હિસ્સો હોવી જોઈએ.

જરૂરથી ચેક કરો ઘરનો ખૂણે-ખૂણો

રેન્ટ એગ્રીમેન્ટ ફાઈનલ કરતા પહેલાં ઘરનો ખૂણે-ખૂણો સારી રીતે ચેક કરો. દીવાલોનો પેઈન્ટ, ફ્લોરની હાલત, વીજળીના બોર્ડ, અને કિચન-બાથરૂમના નળ-પાઈપ વગેરેની તપાસ કરી લો. જો કોઈ વસ્તુ તૂટેલી કે ખરાબ હોય, તો મકાનમાલિકને જણાવો અને તેને શિફ્ટ થતા પહેલાં જ ઠીક કરાવો. જો તમે જોયા વગર શિફ્ટ થઈ ગયા, તો ઘર ખાલી કરતી વખતે તે તૂટ-ફૂટનું પૂરૂં બિલ તમારે જ ભરવું પડી શકે છે.

જરૂરથી જાણી લો સોસાયટીના નિયમો

ઘરમાં સમયે-સમયે થતા રિપેરિંગના કામ જેમ કે, કલર-કામ, જૂના વાયરોનું સમારકામ કે પ્લમ્બિંગનો ખર્ચ કોણ ઉપાડશે? જો તમે પૈસા ખર્ચો છો, તો શું મકાનમાલિક તેને આગામી મહિનાના ભાડામાંથી કાપી લેશે? આ પહેલાથી જ નક્કી કરી લો. આ ઉપરાંત, ઘણી હાઉસિંગ સોસાયટીઓ અને મકાનમાલિકોના પોતાના કેટલાક ખાસ નિયમો હોય છે, જેમ કે- ઘરમાં પાલતુ પ્રાણીઓ ન રાખવાં, નોન-વેજ ન રાંધવું કે મોડી રાત્રે ઘરે આવવા પર પાબંધી. આ નિયમોને એગ્રીમેન્ટમાં જરૂર વાંચો.

માલિકી અને NOCની ખાતરી કરો

સૌથી મહત્વની વાત કે એગ્રીમેન્ટ કરતા પહેલાં કાગળો જોઈને એ જરૂર કન્ફર્મ કરી લો કે તમે જેની સાથે ડીલ કરી રહ્યા છો, તે જ ઘરનો અસલી માલિક છે અને સોસાયટી પાસેથી રહેવાનું 'નો ઓબ્જેક્શન સર્ટિફિકેટ' (NOC) પણ લઈ લો.