1 વર્ષમાં બૅન્ક ખાતામાં કેટલી રોકડ જમા કરાવી શકાય? જાણો ઇન્કમ ટેક્સ ડિપાર્ટમેન્ટના કડક નિયમો
Summarized by AI; it may make mistakes. Check important info
Summarized by AI; it may make mistakes. Check important info
Income Tax Rules On Cash Deposits: સામાન્ય રીતે લોકો બચત ખાતામાં રોકડ રકમ જમા કરાવતા હોય છે, પરંતુ શું તમે જાણો છો કે બૅંક ખાતામાં મોટા પ્રમાણમાં થતી કેશ ડિપોઝિટ પર આવકવેરા વિભાગની સીધી નજર હોય છે? સરકાર અને ટેક્સ વિભાગનો મુખ્ય ઉદ્દેશ્ય અઘોષિત આવક, ટેક્સ ચોરી અને મની લોન્ડરિંગ જેવી ગેરકાયદેસર પ્રવૃત્તિઓ પર અંકુશ મેળવવાનો છે. જો તમે પણ તમારા બચત ખાતામાં વારંવાર કે મોટી રકમમાં રોકડ જમા કરાવો છો, તો ટેક્સ અને બૅંકિંગના નિયમો જાણી લેવા અનિવાર્ય છે.
₹10 લાખની રિપોર્ટિંગ લિમિટ
હાલના આવકવેરા નિયમો અનુસાર, જો કોઈ વ્યક્તિ એક નાણાકીય વર્ષ દરમિયાન પોતાના એક અથવા એકથી વધુ સેવિંગ્સ એકાઉન્ટ્સમાં કુલ મળીને ₹10 લાખ કે તેથી વધુ કેશ જમા કરાવે છે, તો બૅંકો માટે તેની માહિતી સીધી ઇન્કમ ટેક્સ ડિપાર્ટમેન્ટને મોકલવી ફરજિયાત બને છે.
- આ લિમિટ કોઈ એક ટ્રાન્ઝેક્શન પર નહીં, પરંતુ સમગ્ર વર્ષ દરમિયાન કરાયેલા તમામ રોકડ જમાના સરવાળા પર લાગુ પડે છે.
- ₹10 લાખથી વધુ કેશ જમા કરાવવાનો અર્થ એવો બિલકુલ નથી કે તમને સીધી ટેક્સ નોટિસ આવી જશે. જો તમારી પાસે તે નાણાંનો કાયદેસર સ્ત્રોત અને યોગ્ય હિસાબ હોય, તો ચિંતા કરવાની કોઈ જરૂર નથી.
₹10 લાખથી વધુ કેશ જમા કરાવવા પર શું થાય?
બૅંક એકાઉન્ટમાં પૈસા જમા કરાવવા પર પોતાનામાં કોઈ સીધો ટેક્સ લાગતો નથી. પરંતુ જો તમારું કેશ ડિપોઝિટ ₹10 લાખની મર્યાદા વટાવી જાય, તો આવકવેરા વિભાગ તરફથી તમને તે નાણાંના સોર્સ અંગે પૂછપરછ થઈ શકે છે. જો આ નાણાં તમારા પગાર, બિઝનેસ પ્રોફિટ, ભાડાની આવક કે ખેતીની આવકમાંથી આવ્યા હોય અને તમે તેને તમારા ઇન્કમ ટેક્સ રિટર્ન(ITR)માં યોગ્ય રીતે દર્શાવ્યા હોય, તો કોઈ મુશ્કેલી ઊભી થતી નથી. તેથી હંમેશાં સેલરી સ્લિપ, બિઝનેસ સેલ્સ રૅકોર્ડ, રેન્ટ એગ્રીમેન્ટ કે જમીન વેચાણના દસ્તાવેજો સાચવીને રાખવા જરૂરી છે.
₹50,000થી વધુ રોકડ જમા પર PAN કાર્ડ ફરજિયાત
જો તમે બૅંકમાં એક જ દિવસમાં ₹50,000 કે તેથી વધુ કેશ જમા કરાવવા જાઓ છો, તો તમારા પાન કાર્ડ(PAN) નંબર રજૂ કરવો ફરજિયાત છે. જો તમારી પાસે PAN કાર્ડ ઉપલબ્ધ ન હોય, તો તમારે બૅંકમાં 'ફોર્મ 60' ભરીને આપવું પડે છે. આ નિયમ રોકડ વ્યવહારોનો સચોટ રૅકોર્ડ રાખવા માટે બનાવવામાં આવ્યો છે.
કલમ 269ST: 1 દિવસમાં ₹2 લાખથી વધુ કેશ લેવા પર 100% પેનલ્ટી
આવકવેરા કાયદાની કલમ 269ST હેઠળ એક અત્યંત કડક જોગવાઈ છે. આ નિયમ મુજબ તમે એક જ દિવસમાં કોઈપણ એક વ્યક્તિ પાસેથી ₹2 લાખ કે તેથી વધુની રોકડ રકમ સ્વીકારી શકતા નથી. જો કોઈ વ્યક્તિ આ નિયમનું ઉલ્લંઘન કરે છે, તો તેણે લીધેલી કુલ રોકડ રકમના 100% જેટલો જંગી દંડ ભરવો પડી શકે છે.
