ઇસ્ત્રી પર જામી ગઈ છે કાળાશ? આ સરળ ટ્રિક્સથી મિનિટોમાં ગાયબ થશે બળેલા ડાઘ

How to clean burnt iron: કપડાં પર ઇસ્ત્રી (પ્રેસ) કરતી વખતે કેટલીકવાર વધુ પડતી ગરમીને કારણે કપડું ઇસ્ત્રીની નીચેની પ્લેટ પર ચોંટી જાય છે. તેના કારણે ઇસ્ત્રી પર કાળા ડાઘ અને બળેલા કપડાનું થર જામી જાય છે. જો સમયસર તેને સાફ કરવામાં ન આવે તો આ કાળાશ અને ગંદકી બીજા કપડાં પર ચોંટીને તેને પણ બગાડે છે અને ઇસ્ત્રીમાંથી બળવાની દુર્ગંધ આવવા લાગે છે. જો તમે પણ આ સમસ્યાથી પરેશાન છો, તો ઘરમાં રહેલી ચીજોની મદદથી મિનિટોમાં ઇસ્ત્રીની પ્લેટને એકદમ નવી જેવી ચમકાવી શકો છો.

મીઠાનો ઉપયોગ કરીને કાળાશ દૂર કરો

ઇસ્ત્રીની કાળાશ સાફ કરવા માટે મીઠું ખૂબ જ અસરકારક સાબિત થાય છે. આ માટે ઇસ્ત્રીને સ્ટીમ વગર હળવી ગરમ કરી લો અને ત્યારબાદ સ્વિચ બંધ કરીને પ્લગ બહાર કાઢી લો. હવે એક લાકડાના બોર્ડ પર સારું એવું મીઠું પાથરી દો. હળવી ગરમ ઇસ્ત્રીને આ મીઠા પર એકાદ મિનિટ સુધી ગોળ-ગોળ ફેરવો. જો મીઠું કાળું થવા લાગે તો નવું મીઠું મૂકીને આ પ્રક્રિયા ફરીથી કરો. આમ કરવાથી જામી ગયેલી કાળાશ દૂર થઈ જશે. ત્યારબાદ ઇસ્ત્રી ઠંડી થાય એટલે ભીના માઇક્રોફાઇબર કપડાથી તેને લૂછી લો.

બેકિંગ સોડાથી બળેલા ડાઘ સાફ કરો

ઇસ્ત્રીની પ્લેટ પર જામી ગયેલા ડાઘ સાફ કરવા માટે બેકિંગ સોડાનો ઉપયોગ કરી શકાય છે. તે માટે 2 ભાગ બેકિંગ સોડામાં 1 ભાગ પાણી ઉમેરીને ઘટ્ટ પેસ્ટ બનાવી લો. આ પેસ્ટને ઇસ્ત્રીની પ્લેટ પર લગાવીને જૂના ટૂથબ્રશની મદદથી ધીમે-ધીમે ઘસો. ડાઘ સાફ થઈ ગયા પછી ભીના માઇક્રોફાઇબર કપડા વડે પ્લેટને બરાબર લૂછીને સાફ કરી દો.

પેરાસિટામોલ ગોળી પણ આવશે કામ

ઇસ્ત્રી પરની ચીકણી કે જામી ગયેલી ગંદકી હટાવવા માટે પેરાસિટામોલની ટેબ્લેટ પણ ઉપયોગી છે. સૌપ્રથમ ઇસ્ત્રીને હળવી ગરમ કરીને પ્લગ કાઢી લો. ત્યારબાદ ચીપીયા વડે પેરાસિટામોલની ગોળી પકડીને તેને ગરમ પ્લેટ પર ધીમે-ધીમે ઘસો. ગરમીના કારણે ગોળી ઓગળીને જેલ જેવી બની જશે અને ગંદકીને દૂર કરશે. આ પછી ભીના માઇક્રોફાઇબર કપડાથી પ્લેટ સાફ કરી લો. આ પ્રક્રિયા કરતી વખતે હાથ દાઝી ન જાય તેનું ખાસ ધ્યાન રાખવું.

સાફ-સફાઈ કરતી વખતે આ બાબતો ધ્યાનમાં રાખો

ઇસ્ત્રીની સફાઈ શરૂ કરતા પહેલા તેને પ્લગમાંથી ચોક્કસપણે અલગ કરી દેવી જોઈએ. પ્લેટ સાફ કરવા માટે ક્યારેય છરી, બ્લેડ કે અણીદાર વસ્તુઓનો ઉપયોગ ન કરવો, તેનાથી પ્લેટ પર સ્ક્રેચ પડી શકે છે. ઉપરાંત, ઇસ્ત્રીમાં આવેલા સ્ટીમના નાના કાણાંમાં કોઈ પેસ્ટ ન ભરાય તેનું ધ્યાન રાખવું અને સફાઈ માટે હંમેશા સોફ્ટ માઇક્રોફાઇબર કપડાનો જ ઉપયોગ કરવો.